السلام عليكم

هذي احدا قصائد الشاعر المبدع

ثامر شبيب الدقباسي

لحظه قبل لا تطلب البعد وتغيـب = وتنهي معايه مرحله مـن حياتـك
أخذ الهدايا والصـور والمكاتيـب = دامي خسرتك ما أبـي ذكرياتـك
يمكن يكون فراقنـا رأيٍ مصيـب = خيره .. كتبها الله جتنـي وجاتـك
مع اني ادري انت ماعنك تجنيـب = كنك موصيني وقاضـب وصاتـك
رح واترك بقلبي لك أربع معازيـب = معزتك طاريـك حبـك غلاتـك
وإن شفتني أجمع شتاتي .. ماهو عيب = باكر مع الأيـام تجمـع شتاتـك
وإن شفتني شايل جروحٍ معاطيـب = باكر يصير الجرح أبـرز صفاتك
أكبر مصيبه في زمـان العذاريـب = إنّي أحبك وأنـت حبك لذاتـك
الطيب لو إنـك تجازيـه بالطيـب = ماكان تالي الوقت هـذي سواتـك
يا صاحبي لا صرت أغلا الأصاحيب = لا تزعل بكيفك وتطلب رضاتـك
أنا حبيبك مبعد الشـوح مانيـب = من ضيّع جهاته .. يدور جهاتـك
إن كان ماعديـت روس المراقيـب = ماني كفو أصلاً أنـام فـي عباتـك
شفني مقدر عند عكف الأشانيـب = مانيب من تومي عليـه بعصاتـك
رح للفراق إللي تركنا مصاويـب = شمّت اعداتي قبل تشمّت أعداتـك
الله معك .. رح وين ماودك تغيـب = هذي حياتك .. وأنت حر بحياتـك