أيامنا والليالي كم نعاتبها= شبنا وشابت وعفنا بعض الاحوالي
تاعد مواعيدٍ والجاهل مكذبها= واللي عرف حدها من همها سالي
ان اقبلت يوم ماتصفى مشاربها= تقفي وتقبل ومادامت على حالي
في كل يومٍ تورينا عجايبها = واليوم الاول تراه أحسن من التالي
أيام في غلبها وايام نغلبها= وأيام فيها سوا والدهر ميالي
جربت الايام ومثلي من يجربها= تجريب عاقلً ذاق المر والحالي
نضحك مع الناس والدنيا نلاعبها= نمشي مع الفي طوع حيث مامالي
كم من علوم وكم من أداب نكسبها= والشعر مازون مثقالٍ بمثقالي
اعرف احروف الهجا بالرمز واكتبها= عاقل ومجنون حاويٍ كل الاشكالي
لاشك حضي ردي والروح متعبها = مافادني حسن تاديبي مع أمثالي
ان جيت أبي حاجةً عزت مطالبها= العفو محدً عن المخلوق بيسالي
قومً الياجيتها صكت حواجبها = وابدت لي البغض في مقفاي واقبالي
وقومٍ الياجيتهم رفت شواربها= بالضحك وقلوبها فيها الردا الجالي
ماكني الا مسويً حال مغضبها=والكل في عشرتي ماكر ودجالي
الجار جافي وكم قومً نحاربها= والاهل وأصحابنا والدون والعالي
والروح وش عذرها في ترك واجبها= راح الحسب والنسب في جمع الاموالي
نفسي تبى العز والحاجات تغصبها= وترمي بها بين أجاويد وانذالي
عفت المنازل وروحي يوم أجانبها= منها غنيمه وعنها البعد اولالي
لاخير في ديره يشقى العزيز ابها= يمشي مع الناس في هم واذلالي
داربها الخوف دايم مايغايبها = والجوع فيها معه من بعض الاحوالي
جوعاً سرا حينها شباعٍ ثعالبها= الكلب والهر يقدم على كل سربالي
عز الفتى راس ماله من مكاسبها= يامرتضي الهون لاعز ولامالي
والناس أجانيب لين إنك تصاحبها= تكون منهم كما قالوا بالامثالي
الأرض للــه نمشـي في مناكبها = والله قدر لنا ارزاق وأجالي
حث المطايا وشرقها وغربها=واقطع بها كل فج دارسٍ خالي
واطعن انحور الفيافي مع ترايبها= وابعد عن الهم تمسي خالي البالي
لومت في ديرةٍ قفرً جوانبها = فيهالمواطي السباع الغبس مدهالي
أخير من ديرةٍ يجفاك صاحبها= كم ذاالجفاوالتجالي والتملمالي
دوس المخاطر ولاتخشى عواقبها= الموت واحد ولا عند القدر جالي
ترى المنيه اذا مست مخالبها= تدرك لوكنت في جو السما العالي
والشمس في برجها والغيم يحجبها= تقبل وتقفي لها في الفلك مجدالي
رب السموات يامحصي كواكبها = يامجري السفن في لجات الاهوالي
ضاقت بنا الارض واشتبت شبايبها= والغيث محبوس يامعبود ياوالي
يالله من مزنةٍ هبت هبايبها = رعادها بات له في البحر زلزالي
ريح العوالي من المنشا تجاذبها=جذب الدلي من جال مطوية الجالي
ديومةٍ سبلت وأرخت ذوايبها = وأنهل منها غزير الوبل همالي
تسقي ديارٍ عزيز الوقت حاربها= ماعاد فيها لبعض الناس منزالي
وأزكى صلاةً على المختار توحي بها= شفيعنا يوم الحشر فيه الاهوالي

اقتباس من مشاركة الغريب@ (المشاركة 508373) الشاعر /حجاج العريض صح لسانك وسلمت اناملك على النقل الرائع الذي يدل على ذوقك الرفيع وتقبل مروري يالغالي