لعل برّاق تخيله مصاليح = من الاحساء سيله لقصى ام شيحه
العصر جاب هموم قلبي مراويح = مزنه جمع بين البسيط ونطيحه
اشوف واسمع واكتم السر مابيح = وانا الضماير من سكوتي جريحه
بيني وبين العلم مسراء ومصابيح = وبينه وبين اللي يبي الهرج صيحه
مايجرح الأصباع سلك المسابيح = ولا يحزن السكين موت الذبيحه
هب الهواء من غرب واستنشط الريح = من غرب يدفعني على الشرق ضيحه
في ليلةٍ غبراء سماها صحاصيح = ترمي على المستور ثوب الفضيحه
ضيعت صبري والفرج والمفاتيح = ما مر فيها البال ساعة تريحه
دنيا بها تقلط وجيه مقابيح = وطالة بها يدين الخبول الشحيحه
وقصرت بها يدين الرجال المفاليح = اهل الزعامه والوجيه الفليحه
صاروا بها الدنيا ضعوفٍ سراسيح = لو يارد الماء ما يجمّل صريحه
مرحوم ياشيخٍ يبي يقوم ويطيح = من عام الأول ما تعدى مطيحه