صدق وقال القول والقول ذمه=الكذب عيب ولا كسب خير راعيه
وأقلبي اللي كل همً يخمه= اللي يخمه خم واللي يناديه
واللي يحدره تحت واللي يزمه= واللي يصوت له علي وادي التيه
واللي يصفق له علي راس قمه=واللي يسوي له حواجز تمويه
يسبح لحاله بالبحور المطمه=وتعبت يديه من السباحه ورجليه
وشمل تشتت منهو اللي يلمه=وحبيب أبعد منهو اللي يدنيه
وين الحبيب اللي بصدرك تضمه= او وين الصدق او وين تبغا تلاقيه
ومن لايشم الورد خشمه يصمه=يصم خشمه صم ويسكر أذنيه
وجهً يعد من الوجيه المرمه= وأهل الوجيه البارده مالها وجيه
ويطلع صديقك في نهار الملمه= وإن ماطلعلك مابقي شي ترجيه
ومن يقترب من شر يمكن يعمه= لو إن هذا الشر ماله دخل فيه
الداب فارق رمثــته قبل سمه= فرقاه خير من تحذر حواليه
وأن صادفك من حط راسه بكمه= لاتناقشه في شي والا تناحيه
ولافيه للقمام غير المقمه= ولافيه للمجنون ياغير أهاليه
ومن لايروم العـز وإالا يشمه=خله يولي لـعنبـو من يماشيه
ولاخير في رجال مايفور دمه=ولاخير باللي مايقدر بناخيه
ولاخير باللي كل شي يهمه= ولاخيربالرجال لابان خافيه
ولاخير باللي مايوايق علي امه= وإيعرف ماتبغاه قدام يشــريه
ورجلً بليا إيمان مافيه ذمه=ولاهو بـويا الربح رجلً يخاويه
ومن فيه حسد بذمتي فيه نمه= ومن فيه نمه يقطع الله طاريه
ولاتمدح الرجال ثم ً تذمه=إن ماحصلك مطلبك قمت تشنيــه
رح للذي يرتح لارحت يمه=ومن لايبـيلك يوم تزعل منه ليـه
وعسي الردي مايفرج الله همه=وعسي مريض القلب مالله يشفيه
وأم الليـالي ليلةً مدلهمه=وأم الخبائث خمر يختل حاسيه
وحـلو الحـرام يصير بعـدين غمه= ولاربح بياعه ولاربح شاريه
وحرف بلا فتحه ولافيه ضمه= يغلط بنطقه بعض الاحيان قاريه
وتبي الحديد يذوب بالنار حمه=وتبي الكلام يزين عمق معانيه
وأنا أشــهد إن الوقت هذا مطمه= ليا فكر الرجال باللي حواليه
والفضل لله والله اللي يتمه=والله عظيم وكل شيً يسويه

اقتباس من مشاركة مسندالعويمري (المشاركة 356331) صح السان البحر الميت ومشكور على النقل