قبيلة بني رشيد - مساجلة بين مضيان عواد وسهل نافع

بسم الله الرحمن الرحيم

أيها الأعزاء
السلام عليكم ورحمة الله وبركاته وبعد ؛؛؛

يسرني أن أقدم لكم هذه المساجلة بيني وبين الشاعر العلم / سهل نافع المهيمزي الرشيدي

آمل أن تحوز على رضاكم

قال من ماحركه كل موالي=ولاعشق بالنايفة كود نايفها
مارقا الا مرقبٍ ساميٍ عالي=راس عيطاً شامخٍ عن طوارفها
ياسلام الله ماهل همالي=من مزونٍ مايوقف تكاشفها
سيلها من ساعته بالوطا سالي=ضيّق الوديان والطلح ينسفها
ياسلام الله على طيب الفالي=شاعرٍ يعطي الحقايق وينصفها
شاعرٍ له في سما الطيب منزالي=راس من روسٍ تشّرف مواقفها
ابن نافع كان تحتاج حلالي=حكمته تصعب على اللي يوصفها
مايكود الكود ياكود رجالي=مثل ابن نافع بحاضر وسالفها
في قصيده مايجي غثّ وهزالي=صارفه صرف الجواهر بمصرفها
ان مدحته ما انقص لغيره أفعالي=العوارف عارفه مانعرّفها
ياسهل لو قلت ماهي على بالي=صرت مثل مسيلمه يوم أسولفها
يوم قيل الذاهبة مالها والي=واستوت لضعيّف النفس يلهفها
دار حول الذاهبة قدح وجدالي=وانتهت في نكبة اللي مزيّفها
ورِّدت عد الروا ماهو حثالي=واعنا راسٍ مراده يحرّفها
ماتطيح الدّرّة وسعرها غالي=لو خبيثين النوايا تلقّفها
أعنف الصفقات مع مر الأجيالي=لا قطع بوجيه الأعراف مصلفها
والتحية مسكها بأول وتالي=قبل مبداها ليا بعد منكفها

أبو نوح
مضيان عواد الشويلعي الرشيدي

وإليكم الرد

يا كريم الجود يا محص الاعمالي=يامثبتها و مجري عواصفها
استعينك في حلولي وترحالي=واطلبك نفسي بحبك تشرفها
جعلي في طاعتك قدر وجلالي=ابصط الرحمه لحالي ولحفها
ولاتخلي لاهل القيل والقالي=العفون اللي مخمه شراشفها
جعل ما يبقا لهم بالبقا والي=من غثاهم تربة الارض نظفها
وعقبها يا خاطرة بدع الامثالي=في فصول الشعر وأجمل مصايفها
يو م جا للشعر قامه و مرحالي=وقام هاجس بدع الامثال يجرفها
مرحبا فبيو ت سمحين الاقبالي=الرجال اللي تكاشف صحايفها
الرجال اهل الوفا عقل وعقالي=اهل اللزمه مرايا عوارفها
صدقهم باقوالهم كنه هلالي=لا طلع في ليلةٍ صم شايفها
من شوارد راس فارس وخيالي=يثني رقاب الصعايب ويعسفها
ما تحيل في قصيده ولا احتالي=ولا استعان بغير عرفه يولفها
في بيوته وجه حذقات الاشكالي=كن جنحان الشياهين توحفها
ما لهن في موطن الهون مدهالي=في وكور اللي تعلت مشارفها
من رشاقة يقظة الحر تختالي=فوق صطح الريح مدت رفايفها
وانجمت لين الفضا دونها حالي=وردّت الجنحان وأرخت شلايفها
في صواب الطيبة ما لهن تالي=تنقطع منهن رجاوي حسايفها
كن منهن بالجزيلات تمثالي=من مواميها الهيبة عكايفها
صدقهن من صدق كرمين الاسبالي=الرجال اللي تشرف مضايفها
في مثانيهن عزاوي هوبالي=ناوةٍ صبت على الأرض واكفها
في حماهن ينطفي حامي الصالي=تبطن العزه رواها وترعفها
ومن نزاهة طيب العم والخالي=ميركة طيب الخلف من سلايفها
ساقهن يمي مضيان بالحالي=رهن اشارة فكرته ما تخالفها
درهمن قدم ابن عواد زرفالي=حيبو فكرٍ عن النقص حايفها
والختام اطلبك يامحص الاعمالي=تستر الامه بستر ك وتلحفها

الشاعر

سهل نافع المهيمزي الرشيدي