يا كثر ما رافقت خلان وأحباب=ويا كثر ما في شدتي همّلوني
على كثر ما اعدهم ستر وحجاب=على كثر ما احتجتهم واتركوني
من صارت الاخُوه ثمن حفنة تراب=نفس الوجيه إلي نصوني..نسوني
من غير ذكر عروق و فروق وانساب=كانوا ثلاثة..والثلاثة جفوني
علمتهم وشلون الاهداف تنصاب=ولما سواعدهم قُوت.. صوبوني
عشاني اصغرهم عمر..صاروا أحزاب=عشاني أصدقهم قصيد..ظلموني
إللي نجاح اسمي زرع فيهم أنياب=حتى النصيحة ما بغوا ينصحوني
دام العطايا عندهم دين واتعاب =والله لو اطلب ذنبهم ما عطوني
طالب نصيحة كني مطالب أرقاب=وهي نصيحة..كيف لو زوجوني ؟
كنت اكتب لنفسي مِشَاريه وعتاب=ولا ادري إن إلي قروني...قروني
تضاربت من دوني عقول وألباب=واجد بغوا غيري..و واجد بغوني
أقفل هدب تسهر على شعري أهداب=كني حبست رقادهم في جفوني
لو شفتهم واحد يشوفوني أسراب=من وين ما لدوا نطرهم لقوني
اثري وجودي بينهم محرق أعصاب=ومزعل بعضهم من بعض لو طروني
يا كبري بعيني وانا توني شاب=واهم كتاب الشعر حاربوني
حتى ولو يهوي على نجمي شهاب=يكفيني أن اسمي كبير بعيوني
تجذ قال أبوي ان هبتهم..قول: ما اهاب=ولو يقدرونك..قول: ما تقدروني
وما دام قبري محتضن راس مرقاب=على كثر ما تقدرون أدفنوني
لو ماني بذيب..أنهشت عظمي ذياب =لو ما قدرت اثبت وجودي لغوني
لو ما سكنت وجيهم..مت بغياب=لو ما عرفت امحي ورقهم محوني
ما جيت أبذبل كبدهم شعر وخطاب=لين اذبلوا كبد الذي خلفوني
يا ويل وجهي كانه للدمع مخلاب = ما جف ماه و ما استحى من طعوني
كل ما طرى لي منظر مريب و ارتاب = كان الوحيد اللي يحرك شجوني
قبلة صلاة..وذكر..وخشوع..وكتاب = وأمي على سجادة النور دوني
تدعي لي الله يفتح بوجهي ابواب = تتوسله بالشدة يكون عوني
من كثر ما خفاقها بالدعا ذاب = صارت تحسان ان زملاي كرهوني
بشرتها..يمه معي ربع و اصحاب = ماني لحالي..واجد اللي يبوني
من يوم ما حاز قلمي كل الالقاب = قلطتهم في دفتري و احفظوني
الله وهبنيهم بني عم و أجناب = من يوم جيت اعجبتهم و اعجبوني
واعجابهم فيني مهو بأية اعجاب = بأسلوبي..بشرحي..بطرحي...بلوني
لو قلت عن نفسي بشر..صرت كذاب = لو قلت دمي من ذهب صدقوني
لو بيدهم كان زرعوا دربي اعشاب = لو بكيفهم يتشبهون..اشبهوني
من كثر ما صاروا من طبوعي قراب = حتى بلبسة شمغهم قلدوني
واجد دعوني و اغلقوا دوني الباب = وكثار ناس ابكي لهم و ما بكوني
لو طالوا لهدمي مناسيب و اطناب = كانوا و غلاتج من زمان اهدموني
مادام حطوا فيني عيوب و اسباب = جنبت عنهم مثل ما جنبوني
اصلا لو ان بخوتي شي ينعاب = ذبحت نفسي قبل لا يذبحوني
انا يدي لو ما كست متني ثياب = نذراً علي اقطع يدي من متوني
مو عيب اجي مدعو ولا اشوف ترحاب = العيب لو اني رجعت ان دعوني
مادمت اجي ولا يحسبوا لي حساب = حرمت اروح...اذا يبوني...يجوني