لاصرت بايعني أشوفك على خيـر=مع السلامـه دام مابـه سلامـه
قلت أنتهينا قلتلـك خيـر ياطيـر=ماني بأول شخص يخسر غرامـه
محذرك من قبلهـا ألـف تحذيـر=لاعفتنـي بيعيـف قلبـي هيامـه
ماني بميت لا ولا أحتـاج تبريـر=صح الله لسانـك ووفـر كلامـه
بسمعك حبكـه وفكـره وتصويـر=وأفهم عـدل يامدعـي بالفهامـه
وجه الشعر ابيض ويحتاج تغييـر=ودي تزيـن هالقصيـده علامـه
ماضيك الاسود بأذكره دون تقصير=كذا يكون بخـده الشعـر شامـه
يصدق معي تعبير ويخون تعبيـر=ياضيعت الشاعر بوقت أنسجامـه
يمكن خطا أدونـك بالشعـر ميـر=لو ماحترمتـك للغـرام أحترامـه
ماكان حبك غير بس طعنتك غيـر=علمتني معنـى النـدم والندامـه
ماجاك مني اي زلـه و تقصيـر=كل مأخطيـت أعاتبـك بأبتسامـه
حسبي على الذكرى أذاهبت عصير=ماعاد تنفـع شرهتـي والملامـه
البال ضامي وقتها والحـزن بيـر=خسرتك وهمي كسبـت أهتمامـه
والليل فازع لك كذا جانـي مغيـر=ظلمتني وأكثـر ظلمنـي ظلامـه
لاقبل علي اوحيت صوت المسايير=وفزيت كل ضيف(ن) اقوم بمقامه
واليا عزم هاالليل ضيقه وتفكيـر=قلي بربـك كيـف أبقـدر أنامـه
مافيه داعـي للعتـب والمعاذيـر=الغدر خال الجرح وأطيب عمامـه
اما يجيب الله مطر تالـي وخيـر=ولا السلامه ماش مامـن سلامـه