ياشاعر الإنس مدري شاعر الجن=مسيـت بالخيـر ياسيـد الشواعـيـر
ماشفتلي هن مدري وش بـلا هـن=ساق الذهـب للعروسـه بالقناطيـر

الله يعينك على هجوسي ليا جـن=وأنته بعد سيدنا مسيـت بالخيـر
الباب يا سع جمل والخيل لا جـن=ولا نطرد الهاربه واللي هرب عير

هاجسك دولار وألا هاجسـك يـن=الصرف موجـود حتـى بالدنانيـر
الخيل كنـه وراهـا يقـرش الشـن=أثرك تحوف البلد مثل المعاصير

الله يحييك بين الهيـل والبـن=يا شاعرن مالك ألا كـل تقديـر
أن كان صننت خذ مني دبل صن=والحوف مايخوفك ياسالم الزير

العام بالبحر الاحمر شفتك اتون=تضرب سفينة ربوعلك مناعير
لاتحسب إنك خفي ياراعي الفن=الدلو تطلع زلال الماء من البير

لا شفت بحر الخليج اليعربي غـن=خـل البوابيـر تصـدم بالبوابيـر
يا صاحب النجر صوت النجر لا دن=يجذب بصوته عليك الذيب والطير

ياصاحبي ماخذتنا ضحكـة السـن=سرحتها وهي كبر اطويق والنير
ليتـك تحـرا اليقـن وتتـرك الظـن=مادام صاحبك غير وشوفتك غير

السارحه طن وثر الظاويـه طـن=والساج مسمور في عشرة مسامير
شعيل مثل الجمـال اللـي يحنـن=أرقابها عوج لكن تقطـع السيـر