يالله يلي من ترجاك ماخاب=يالواحد الي كل همٍ تزيله
يافارج الضيقات فكاك الأنشاب=محي العظام الهامدات النحيله
تفرج لمن همه من العام ما غاب=ما مر يومٍ هاجسه ما يجيله
قصة حياته قصةٍ ترهب ارهاب=والوقت قاسي والمشاكل حصيله
سود الليالي وقفت تطرق الباب=والحزن معها فارشٍ لي شليله
أبغضت ربعي والجماعه والأقراب=وأخذت بالوحدة ليالٍ طويله
ذقت العنا والوقت خاين ونصاب=والقلب ولّع داخله بالفتيله
نكبة زمانٍ صادفت بعض الأسباب=من وين ما مد النظر مستحيله
واخر علومي بالوناسة والأصحاب=قدام شوفة واحدٍ مهتويله
الصاحب الي صار لي سيد أحباب=لأجله تحملت الحمول الثقيله
حبه جذبني جذب دلوٍ بمجذاب=ولالي على فرقى هوى البال حيله
أزريت أسلي خاطري وأملك أعصاب=القلب كنه في يدينه يشيله
واقلبي الي صار بيدين لعاب=كورة قدم كلن يناول زميله
بين الرجا والياس والضرس والناب=مدري عنه وش مكسبه من عميله
واليا ادبرت دنياه وانصاد وانصاب=شهيد حب ومصرعه من خليله
وهذا الهوى كم دهور أحوال الأشناب=والي ربح بالحب ناسٍ قليله