يالله يامنزل سبأ والعاديات=والفتح والتوبه وطه والحديد
ياربّ ياخالق جميع الكائنات=ياغافر ذنوب الخلايق ياحميد
ياربّ ياللي لجلك تقام الصلاة=وشهر رمضان يصام لجلك يامجيد
ياللي فرضت الحجّ وإيتاء الزكاة=أعوذبك ياربّ باليوم الشديد
ياربّ ثبـّـتني على درب الثبات=وكاني شقي ياربّ فااجعلني سعيد
البارحه مانمت فارقت السبات=والحزن يجري في شرايين الوريد
ضاقت عليّ الأرض من كلّ الجهات=والهمّ لاروّح بدا همٍ جديد
والوقت يمضي والسنين الماضيات=راحت ووقتٍ راح لايمكن يعيد
والصبر غلّق والعمر لا فات فات=والحظّ وقـّـف لعنبو الحظّ العنيد
ياربّ يسّرها علي بالمقبلات=صبري قضى لونّ صبري من حديد
تعبت من ضيمٍ مسوّيبي سوات=اللي غدرْه الوقت وأيامه تكيد
ماذقت لا راحه ولا ذقت المبات=ولا لي سوى التفكير بالعلم الأكيد
لكن هجوس الشعر لا غنـّت وجات=غنـّيت وأبحرت بطواريق القصيد
والشعر ياأبن الناس يارايح ياآت=وهبه من المعبود خلاّق العبيد
وعرف ودرايه بالبحور الرايدات=في طرس تاريخ القصيد اللي يفيد
تعال يا(رجز) القصايد خذ وهات=وأستأذن (الممتدّ) مقلوب (المديد)
تراي من وقتٍ مضى أكثرت السكات=والوجد يجذبني وأنا وجدي فريد
ياوجد حالي كلّ ماحاولت أبات=وجد اليتيم اللي همومه به تزيد
أو وجد من ذاق اللقاء عقب الشتات=وحلّ الفراق ولا أهتنى في من يريد
على فتاةٍ غيــر عن أية فتاة=علمي بها يوم أتتجهّز للشديد
((والعشق)) يكمن بين ذات وبين ذات=وصبابته مابين سيد وبين سيد
ياروعة العشاق ياأجمل ذكريات=ياأندلس (طارق) وعشق (أبي الوليد)
ياشعر (الاعشى) لا تغزل بالبنات=يامعلقة (عنتر) (وأبن حجْر) (ولبيد)
ياحنكة الحاكم بوقت الدايرات=يافكر (صقر قريش) يوم إنه وحيد
يارفعة السلطان بعيون الجبات=ياعرش (ابو جعفر) (وهارون الرشيد)
ياموتي القاتل وياروح الحياة=ياشلفا (أبن غانم) وياسيف (ابو زيد)
يامضرب الأمثال ياطوق النجاة=ياشوف (زرقاء اليمامه) للبعيد
يافلّ ياريحان ياسكّر نبات=يافرحة الأطفال مطلع كلّ عيد
جعل السنين المقبله والفايتات={تفداك} ياللي صدتني من دون صيد
عشقك موثـّق بالمبادي والسمات=ومع كلّ دقـّة نبض في قلبي يزيد
ولاّ الهجوس اليا ندهتلها وجات=غنـّت وأنا غنـّيت ببحور القصيد