قبيلة بني رشيد - الـدروب الـنـظـيفـه

الشاعر // مطلق بن حميد الثبيتي - رحمه الله

قصيدهـ ولا أروع ولا أجمل
قصيدهـ جزله بمعنى الكلمه حتى وهي طويله .

اختار سمحات الدروب النظيفة

اللي غسلها رايح المزن برشاش

يمشونها قوم النفوس الشريفة

اللي ضمايرهم نقية كما الشاش

ابيوتهم مثل الحصون المنيفة

ما هيب لطير البوم غيران وعشاش

وأحلالهم للضيف دايم مريفة

لو رجلهم يسرح ويضوي على ماش

والرجل منهم مايخلي رديفة

أن مات مثله مات وعاش له عاش

وان مات منهم رجل عقب خليفة

يطعن نحور القوم ويرد الأدباش

يعرف هدف روحه ويعرف وليفه

ما يعرف الخونة ولا هوب غشاش

وليا رزقه الله بعذرا عفيفة

يحطها مابين نونه والارماش

ماهوب على الخفرات يستل سيفه

وان طالعوا فيه الرياجيل ينحاش

حلو النبا سمح المحيا لضيفه

ويصير له خادم مسخر وفراش

وان مد ما مدت يمينه قصيفه

مدت يمينه تبهر الخبل واللاش

وليا هرج تلقى علومه طريفه

ماهو لهفوات المناعير منقاش

وان شبت النيران ما هوب ليفه

في ساعة الكربة سواري ورشاش

سدة بعيد ولا أحد يعرف غريفة

ولا هوب لعرض مكرم العرض نهاش

والشوك في جنبه سوات القطيفة

ان كان ماله بيت مامون وفراش

مايرتكي فوق الخيول الضعيفة

اللي ليا حركتها قدرها طاش

وصحيفته ياطيبها من صحيفة

ولها مع العقال كاتب ونقاش

حاز المراجل والمراجل كليفه

إلا على اللي كل ما رامها هاش

وان شاف له من جانب القوم خيفه

تلقاه للخيفه مهاجم وبطاش

والصدق والمعروف والطيب كيفه

يغبش لها مع طلعة الفجر مغباش

وللحمل ماتلقى جنوبه صخيفه

حوله بروق تعمي العين وافلاش

يصير على جرحه ويمسح نزيفه

طبة بشبة خير من طب الاحباش

ولا هو كما سبع سنونه ضعيفه

دايم يلحسها وللعظم عراش

وان شاف له في غيبه الناس شيفه

ما هو بخيل لاخضر العود فراش

دنياه لن صارت ذلول عسيفه

طوع عليها كل عاصي ونفاش

وان كان قفت ما عليها حسيفه

ولا هو ورا هوج المعاصير قشاش

وان جاع ما وقع كما طير جيفه

واليا عرى ما يلبس سماليل وخياش

الكذب يعرف بين الاجواز زيفه

والصدق مثل السيف صاطي وحشاش