اعزفي لي واطربينـي ياللحـون النرجسيـه=خوضي بحور القوافي واطربي ذيك الحنايـا
هيجني لي وارزفي لـي والعبيهـا سامريـه=لجل عين اللي حلاهـا فـارق بيـن الصبايـا
خضت في بحر (الطويل) .. لا ولا يصعب عليه=قافه اطول قاف فيهم بس ما الحقنـي عنايـا
وجيت (للوافر) وصغته باعذب لحونن شديـه=بعده (الكامل) نظمتـه نظـم عقـدك ياهنايـا
ولو تبين (الرجز) و(الكامل) اجيبـه يابنيـه=و(البسيط) اسهل عليه و(الخفيف) اهون سوايا
و(اتـدارك) فالمعانـي والبحـور اليعربيـه=لجل (اقرب) لك وافصـل ماكتمتـه فالخفايـا
وفيه بحر (الرمل) صغته واشربه شربه هنيه=اشربه مثل (السريـع) ولا يوصـل مستوايـا
و(المضارع) و(المديد) اعسفه عسف المطيـه=بس فيه (المقتضب) قصره يعكر لـي صفايـا
وجيت (اهجز) لك واهيجن يابعد ذيـه وذيـه=وكل ما (المجتث) صغته يطرب السامع غنايـا
وفيه بحرين مـع الشعبـي اضافـه منطقيـه=نوع تجديد ولحون وكـل شاعـر لـه هوايـا
لو نزود حرف واحد فاخـر ابياتـي سويـه=مثل كلمـة ياهـواي كيـف تصبـح ياهوايـا
ولو نزود حرف ثانـي اعتقـد مافيـه شيـه=مثـل كلمـه ياغـلا فيـه تـقـرا ياغـلايـا
وانتي انتي ملهمة شعري وحسـي والاسيـه=اسألك باللـي رفـع قـدرك تعالـي يادوايـا
لازهمت الشعر لاجلك ثـار لـي كلـه حميـه=ثم تسابق لي حروفه ساقهـا صـدق النوايـا
ثم تهل حروف شعري كالمـزون الموسميـه=القوافي مثل قطره وانتـي ياروحـي سمايـا
ايه احبـك ايـه احبـك يابعـد كـل البريـه=ايه احبـك قلتهـا واعلنتهـا لكـل البرايـا
وهذي بحور القوافي صغتهـا لاجلـك هديـه=علها ترضي غرور اللي لجت بيـن الحنايـا