مادك دالوب الحشا تالي الليل=ضيّق محاريف الضلوع وحشرهن
يتل قلبي تلة الفطّر الحيل=اللي عليهن جلوةٍ وتعسرهن
نوبٍ سنود يكزهن حامي الحيل=عيسٍ يفجن الفجوج بنحرهن
ونوبٍ مع المحدار فيهم زرافيل=الملك للي في كتابه ذكرهن
دلايلٍ ماهي هروج ومواويل=معطيهن الله صبر طيلة شهرهن
ضاق المجال بوصفهن والتماثيل=يملنّ وأزريت الوصوف أحصرهن
الله يشتت شمل نقالة القيل=ناسٍ تهد جسور ناس تعمرهن
الحقد لو ماهو على عصر هابيل=لاأقول سار مع العروق ودمرهن
شيءٍ من الواقع مهو ضرب تخييل=واقع مريرٍ والزمن فيه برهن
ياناصر صويان يامرجح الكيل=لله درّك والنفوس وقدرهن
عادات حلحيل المهمات حلحيل=يرقى النوايف مايهمه وعرهن
المسألة ماأظن تحتاج تفصيل=لانلحق الشرهات لين نخسرهن
رأيي ورأيك طالبه دون تأجيل=شلت الهموم وضام قلبي خطرهن
يضونّ مثل مرودمات المخاييل=دهمٍ تسابق سيلهن مع مطرهن
ياالله ياقابل صلاة التنافيل=بأمرك شفاء قلوب البشر من كدرهن