ابا تذكر من جديد التماثيل=لعب يشوق اهل القلوب الفطينه
يامسوي الفنجال كثر به الهيل=احرص عليه وخل حمستك زينه
وعندك ادلال من اخيار المعاميل=ونجر اليا حرك يصوت رنينه
واليا قظت دنيت شه الفناجيل=وقدوعها تمر الحسا جايبينه
وصبه على اللي باللقاء يقلع الخيل=لي ثار حس الهيج مثل المكينه
لينه غدا عج الرمك كنه الليل=ماض الفعول وكلهم خابرينه
لي نشبه اللحيه برده وتحويل=كم واحد بالسيف يقظع منيته
اللي على خيل المعادي غرابيل=مجرب يروى شبات السنينه
وعده على دسم الصحن ذابح الحيل=لي جوه من بعد النيا ناحرينه
جوعه وبيام الشتا وقبل الليل=هلا بهم يضحك احجاجه وعينه
لو هو فقير ولابحاله محاصيل=اليا نواها صار ربه عوينه
عجل اقراهم شوق ضاف المجاديل=وقلط لهم كبش جليل سمينه
واللي بفك المبتلي بالمشاكيل=لي عارضه مع شرطة سايقينه
اما تكفل جان يبقون تكفيل=والا يسلم عنه سلمة يمينة
اللي على جاره سحاب وهماليل=وجاره خشير له ابعسره ولينه
ويعز جاره طيب الراس بالحيل=ويرضي ولد جاره ويقظب جنينه
وقصيرته لو هي مثل نجمة اسهيل=شجاع مايطري العلوم اللعينه
يحطهم في حجر عينه عن الميل=ولابدهم في مافعل ذاكرينه
والحثل خله للرخوم الدعابيل=مايفهمون الهرج زينه وشينه
يقوله اللي يفتهم ردة الجيل =الشايب اللي مقفيات اسنينه
وصلاة ربي عد مافات من جيل=على الرسول اللي بوصط المدينة