قبيلة بني رشيد - طريق الطيب

.
.

راع الرديّه بالردى لا تجازيه
طب فيه لا شفته وسلم وخلّه

اما اعتذر عن فعله اللِّي مسوِّيه
والاَّ ترى طيبك وصمتك دواً له

ولا تلحقه لوم وكلام ومشاريه
اترك جميع الهرج دقّه وجلّه

واسلك طريق الطيب واتبع مباديه
وجنّب طريق أهل الردى والمذلّه

رجلٍ ينومس بالجمايل بني خيه
وتحشم قبيله كلّها حشمةٍ له

ورجلٍ على ما قيل إبليس مغويه
ومعميه عن درب السنع لا يدلّه

غرّه زمانه لين كبّر علابيه
والناس عارفته وتبخص سجلّه

وان جيت تبغى تنصحه تبتلش فيه
تجيه مستانس وتطلع بعلّه

وراع التواضع بيّناتٍ مواريه
صدره وسيع ولا يجي منه زلّه

والرابح اللي طاع ربّه ومرضيه
وربعه يحبونه ويدهل محلّه

-

الشاعر/ عبيد بن فالح أبوجراح أبوثنين
.

.