حبي لها حب لا بعده ولا قبله = يا كود حبٍ تعلق بامر خالقها
والقلب في حبها متقطعه سبله = قليله بحقها لو قلت عاشقها
مع ذكرها يدق قلبي دقة الطبله = والعالم الله يدق لمين خافقها
على رجا وصلها متمسك بحبله = في ثنوة الياس خايف من مفارقها
الجادل اللي خذت قلبي ويتهبله = رعبوبةٍ شبت بقلبي حرايقها
كان اعذب الشعر كثر الكذب في سبله = فيها تصير اعذب الابيات واصدقها
لا ذعذع الغربي اللي هب من قبله = ساعات ليلي تعذبني دقايقها
أسهر تقل كبدي من النوم منديله = وعيني على لذة المرقاد ماشفقها
اخيل مزنٍ تراكم قمت أحسّب له = سحابته شب فيها نوض بارقها
ياالله ياالله يسقي دارها ويله = من شان تستمتع بخضرة حدايقها
يا سعد منهو بحكم الدين تكتب له = يسعد بدنياه وأحزانه يفارقها
أعيش مع ذكر ذاك اليوم وأطرب له = أحلى الأماني عسى ربي يحققها