يامرحبا والقصايد من قرى الحره=مثل اشقر الريش يوم يفل جنحانه
يامرحبا مرار لامره ولا مره=اكثر من الغيث يوم يصب هتانه
واصفى من الجوهره واغلى من الدره=واحلى من الشهد ذوق بصيغة اوزانه
باللي لهم مع مناهيج الفخر جره=منازل الطيب واهل الطيب واركانه
جهينه اللي تجير الجار وتبره=وعتيبه اللي تقود المجد بعنانه
وعيال وايل تكيد اللي على شره=وحرب اهل المرجله والدين واعيانه
ومطير عوق الخصيم ليانوا الكره=وشمر شعار الكرم واحياه واقرانه
وقحطان ماهي لكثر المدح مضطره=ساس العرب كيد من غواه شيطانه
وهذيل لفعولها كل الملا مقره=وزهران للمجد رمز وشانها شانه
وسبيع خويهم يشوف مايسره=وقت الحرايب رحاة الحرب واسنانه
وايضا الدواسر لمدهال الظفر قره=وبني تميم الفخر سوره وبنيانه
والاحمري يوم حد السيف له صره=فرحة صديقه وشوك عيون عدوانه
ويشهد لتاريخ فيفا الضلع مع بره=وبني كثير النقا منشاه واوطانه
ولا اسقط لباقي القبايل وزنة الذره=كل(ن)من المجد يرجح كف ميزانه
اهل الجزيره بوقت الضر والسره=الكل منهم على دينه وعنوانه
رجالهم لويشين الوقت ماضره=وماغيره عن مناهيجه ومسكانه
قومً على منهج التوحيد ومصره=لديانةً مايدورغيرها ديانه
على منار الهدى ماهي بمغتره=ماتركع الا لرب البيت سبحانه
ذوب العسل للصديق وللعدو مره=رمز الشرف لوذة العاني ومزبانه
لاكبرو والثميدي يصطلي حره=والموت صوت على الارواح ميدانه
من فعلهم ضدهم ماينشفي ضره=ويبشر بكل السعد من كانو اعوانه
حياهم الله من الساحل ليا الحره=بسم المعازيب ربعي جهر واعلانه
بسم بني عبس لامره ولامره=اللي تقدم لطيب الفعل برهانه
تسقي الخصيم ان حربها علقم المره=وتجزي جزاء راعي الاحسان باحسانه