قبيلة بني رشيد - زايد ابن عدله وعبيدالله المجيريشي

زايد ابن عدله
سلام يأهل المعرفه والفن والذوق الرفيع=ياصحابنا الهذلان والدنيا كفا الله شرها
العام يوم الروس روس تروس طيعت ماتطيع=واليوم رأسك لان والدنيا كفا الله شرها
عبيدالله المجيريشي
يامرحبا ترحيبةً أعداد همال الربيع=اترجح الميزان والدنيا كفا الله شرها
العام كلن شايلاً ذنبه وحلم الله وسيع=واليوم جمح حصان والدنيا كفا الله شرها
زايد ابن عدله
مايجرح سبوت القدم في مشيها غير النقيع=لايغرك الشيطان والدنيا كفا الله شرها
قلته بعد شفت الودايع من تحت كف الوديع= أثرك فصيح اللسان والدنيا كفا الله شرها
عبيدالله المجيريشي
الطيب يبقى والشجاعه شيء في دم الشجيع=مثبت السيسان والدنيا كفا الله شرها
اللي يعرف الدرب لو طالت دروبه مايضيع=والعرف اله ميزان والدنيا كفا الله شرها
زايد ابن عدله
ترى القناعه كنز مايفنى اليا احسنت الصنيع=والمسلمين اخوان والدنيا كفا الله شرها
قريش لولا الذنب والتكذيب والفعل الشنيع=ما أنزل بها قرآن والدنيا كفا الله شرها
عبيدالله المجيريشي
ياجيد المنسب ترى الأخوال تقعد كل ريع=فالسبعه الريعان والدنيا كفا الله شرها
ماهو بذنب قريش كلً يشتري وألا يبيع=لاتكره القرشان والدنيا كفا الله شرها
زايد ابن عدله
تستخدم أسلوب اللكاعه بس أنا عمك لكيع=ياباشة السلطان والدنيا كفا الله شرها
ابطت بك الأيام تأكل بك طعامً من ضريع=ياهدهد سليمان والدنيا كفا الله شرها
عبيدالله المجيريشي
الذيب لو انه نوى يسري بشاه من القطيع=يامكثر القطعان والدنيا كفا الله شرها
ياشيب عيني ورثة الشايب تولوها الجميع=ملوا بها القدحان والدنيا كفا الله شرها
زايد ابن عدله
الذيب الأشهب يسبر الشاوي قدر مايستطيع= طبع أشهب الذرعان والدنيا كفا الله شرها
الله ياكثر الجنايز وسط مقبرة البقيع=ياشاطي الوجدان والدنيا كفا الله شرها
عبيدالله المجيريشي
ودك تمشا في سفينة نوح بالخط السريع=واشتالك الطوفان والدنيا كفا الله شرها
اللي تضيعه الهقاوي لابصير ولاسميع=عنده عمى الألوان والدنيا كفا الله شرها