قبيلة بني رشيد - يسألني الجوال وش فيـه الارسـال غاب الحبيب ويحسب البرج طايـح

يسألني الجوال وش فيـه الارسـال
غاب الحبيب ويحسب البرج طايـح
يقول فيه ابراج ؟ قلت ايه ثم قـال
أجل علامـي مـآ أهـز وأصايـح
ونـا منـوّل دوم فـالاذن شـغـال
والا مراسـل بينكـم جـاي رايـح
سكت شوي وقال وش بـدل الحـال
وش رجّع همومـن منـول نزايـح
كانت محبتكم بهـا تضـرب امثـال
حتى بمواصلكـم حرقتـوا شرايـح
ونته كلامك كـان مسبـوق بفعـال
ماتتركه لـو دونـه الـدم سايـح
قلت ايـه وبقلبـي مكانـه ولا زال
والخاطـر آبشـرك كلـه سمايـح
لكن حبيبـي فاتـح اذنـه للاقـوال
كنت انصحه لكن رمـى بالنصايـح
عواذلن تاقـف لنـا بكـل مدخـال
بهروجن اصعب من شراب الذحايح
كلامهـم سكيـن ووصالنـا حبـال
خلو الحبيب يغيب وامسـو فرايـح
البعد نارن تشعـل بقلبـي اشعـال
نار المفارق خلـت الصـدر فايـح
من بعد ماله بين الاهـداب منـزال
اليومـه لشوفـه عيونـي شفايـح
يالايمي بالحـب ماشفـت الاهـوال
لكن روح وشـوف سيـد الملايـح
تلقى خصالن مانخلق مثلها خصـال
ريمـن بجانبهـا العـذارى ذبايـح
لن شافها عقـال يمسـون جهـال
وتخلـي عقولـن جهـالا رجايـح
ياقف لها الجلاس ميقـاف تمثـال
ون مرت الوقـاف صـارو طرايـح
ون شافها متعافـي يقـوم منشـال
ون زارت المرضى اخرجتهم صحايح
بالمختصر زينـن يقلّـب للاحـوال
والشرح ماتكفيه بيـض الصفايـح
حتى جزال الشعر في حقهـا هـزال
عن وصفها تعجز جميـع القرايـح
لكن انا شعري يـروّق لـي البـال
نسّانـي اللـي راح والهـم زايـح
الخد شعبه من مزن حزن ما سـال
ولا بـسـدي للمخالـيـق بـايـح
عشان لطرونـي يقولـون رجّـال
علـى المصايـب مايجـرّ النوايـح
لكن جاوبتك عشـان انـت جـوال
جمـاد ماتفـرح علـي بالفضايـح