قبيلة بني رشيد - انا اشهد ان الحــــــــــــب والشوق فضاح

انا اشهد ان الحــــــــــــب والشوق فضاح
واللي يذوق الحـــــــــــــب لاشك مفضوح

وانا اشهد ان العشــــــق يفتك بالأرواح
كل ما قضى من روح يهجم علــــى روح

وانا اشهد ان القـــــــلب في غيبتك ناح
نوح الحمام اللي يغني علـــــــى الدوح

ياسيدي عهدي بشوفــــــتك ســـــواح
تغدي علـــــيّ بالتماثيــــــــــــل وتروح

واليوم اشوفك من عنا الحــــب مرتاح
ماعاد يطربك الغنــــــــــا فيك والبــوح

مدري غلا والا جفا مـــــنك ياصــــــاح
والا تخاف تزود الــــجرح بــــــــجروح

والا الهوى من عينك الناعسه طـــاح
لو ان براق الحـــــيا قدمك يلـــــــــوح ؟

لاتلتفت لي دام عــــــــــنك الهوى راح
خلك خلي الهم والبـــــــــال مــــشروح

كنت احسب ان الحـــــب جلاب الافراح
اثر الفرح في حضرة الحـــــــب مذبوح

وكنت احسب ان الحــــب للهم نـــطاح
حتى غديت بديرة الهم مــــــــــــطروح

جرح الهوى ماهو سكاكين ورمــــاح
نار تشب بداخل الصــــــــــــدر ويفوح

نارٍ سناها للمحبــــــــــــــــــين قد لاح
كل مانطفت تحيا على يد ممــــــــلوح