قبيلة بني رشيد - ويش تعني شرهة البصره على بغدادي يوم صار الراعي المخلص بدون ارعيه

. كن همي سيل متحدر وصدري وادي
آخذ(ن)لي مع متاهه كامل الحريه .
. كل ماقدمت رجلي في مسيري بادي
واستقرت ثابته والثانيه مثنيه .
. اتخيل بالرسوم المرمسات اجدادي
واستعيد الذاكره بجذورها المرميه .
. ادري ان السّم ضد السّم ماني غادي
والافاعي تختلف بالسّم داب وحيه .
. ما انحني لو طاح من ظهر البعير اشدادي
وانصدع راسي من الوقفه على رجليه .
. السؤال اللي جوابه كاتمه بفوادي
لين اشوف الذيب الأشهب ترضعه جنيه .
. ويش تعني شرهة البصره على بغدادي
يوم صار الراعي المخلص بدون ارعيه .
. ياهبيل القلب وش يعني لك المقعادي
وأنت طرقي بالطريق بساقت الطرقيه .
. ما اتفقنا ناخذ المقسوم من ماجادي
وأنت توّك مبتدي بأحلامك الورديه .
. كان مايربطك بأهل الخير ملح وزادي
والله انك تزرع الحسنه وتحصد سيه .
. اعتبر ثوب الحياه اللي عليك احدادي
واعتبر ماذكر في صفحاتها مرثيه .
. ما أنت لاقي لك صدى للصوت يوم اتنادي
موت لين انك تحصل بالسنه قفريه .
. الكلام اللي تقوله ماعليه اسنادي
مثل حلم إبليس بالجنه يبي حوريه .
. ويش ترجي من نفع ماضيك اخير البادي
انتها فصل الربيع وطارت القمريه .
الشاعر عائض الرشيدي