مرحوم ياللي مات في يوم عاشور=عشره محرم من ثلاث وثلاثين
أمرن قضى والعبد منهي ومامور=وحنا بقضا ربي وقدرته راضين
رحل بعد ما عمر سنين وشهور=متبعن السنة بدنياه والدين
شيخن على العز وعلى الطيب مذكور=لا حل ذكره قيل والله ونعمين
بالمرجله ياما مضت له من عصور=من قوه باسه جرب العسر واللين
يسعى لها لو دونها سبعة بحور=عزوم لا منه مشى دربه يمين
شيخن من شيوخ القبيلة ومشهور=شيوخ عبس مرجحين الموازين
تاريخهم من ماض الأزمان مخبور=أهل القنا واليسف سقم المعادين
عالي مقامه ما بها شك وقصور=سعد بن شويلع سعوط المجانين
شيخن حكيم الرأي لا حّكّم الشور=رايه بعقل وحكمه ومنطقٍ زين
شيخن تجيه بّهم وتروح مسرور=شهم وكريم ونسل قومن كريمين
وجعل السحاب اللي مع الجو طابور=يسقى ثرى قبرن ترابه من الطين
ويالله يا مخرج ضلامه من النور=يالخالق اللي كون الكون تكوين
يا جاعل القرآن منهج ودستور=للمسلمين الصايمين المصلين
يا منزل العمران والكهف والطور=ياللي عبادك لك فقارى مساكين
تجعله بالفردوس والذنب مغفور=يقطف ما بين اثمارها والبساتين
يأكل ويشرب ويتزوج من الحور=ويسعد برؤيت رب السلاطين
وما جور يا قلبي من الحزن ماجور=وياللي سمعتم بالدعاء قولوا آمين
صلات ربي عّد ما طارت طيور=على رسولن خاتمن للنبيين