نادو الكابتن نبى ناخذ معه طاروق كايف = قبل لايسري وحنا مانشدنا كيف حاله

العرب في لندن تصيف وخليت المصايف = يشبعك فنجال يوم الناس تشرب بالبياله

جيت يازراق الأشهب تحسبني منك خايف= مرحبا باالداب ابو سنين وحروف الرساله

العرب والغرب تال ايامنا ماهم ولايف = شطر مدري كيف مير احسن لك ادور بداله

كيف ابن مربح معك يالكابتن يسوق الردايف = بعض خلق الله حليل وينكبه كثرة خباله

مشكلتك براسك اللي يحسبنه راس نايف = والدليل انته سواة اللي سبق فعله خياله

حظنا مع اهل الحظوظ إن كان لك حظ متهايف= والحسود ليا زعل لاعل فالي ماهو فاله

هقوتي ماهي قريبه مثل ماحضرتك شايف= والردي له هقوة ٍحوله ولا توصل حباله

من كبر غبنك تسولف معي وعيونك ذرايف= واعرف إني شاعرٍ مايطيح من راسه عقاله

ما تعلمني علامك ملحق ٍ نفسك حسايف= ابن مربح يشري جنيهات شاعر في رياله