عديت في رجمً و يالصدر هيضك=نظم القوافي قبل ضرب الرماحي
أبنصح اللي راح مع عين مبغضك=قبل إنه يخالف دروب الفلاحي
إحذر رفيقً كل ليله يحرضك=على العلوم العوج مابه صلاحي
تراك في حكمه حصانً يروضك=على الرداء و دروب ناسً كلاحي
وده من الأيام يفسد نواجضك=مايستعي في يوم لجل النجاحي
خلاك تفرض للخلايق فرايضك=والكذب و التزوير ما هو مباحي
ماني على ما صار و الله مفوضك=والحق واضح مثل نور الصباحي
نفض ثيابك قبل غيرك ينفضك=إنكان و إنك من طوال الشباحي
وإترك جناب اللي للأكدار عرضك=خلاك ريشه في مهب الرياحي
إخذ النصيحه قبل تبدي حمايضك=دامك تشوف الأرض قدمك براحي
أبعد عن المرضان قدام يمرضك=دامك سليم و لا بقلبك جراحي
تراه بعيون النشاما يخفضك=وإن طحت منته مرتفع بالكفاحي
أبعد عنه و الله بغيره يعوضك=أهل الوفاء تعرف بكل النواحي
دور رفيقً للمراجل ينهضك=وعن ساقط القالات حط السناحي