الله اللي راد والعقده قضاه اللي عقدها=لا على الدنيا سلام ولا لباقي العمر زينه
الفضا ماكنه الا خيمةٍ طاحت عمدها=والفرح ماكنه الا شيخٍ انقصت يدينه
والعمر قطعة زجاج انكسرت ولا طال امدها=والعرب في العيد بدموع اليتامى مستهينه
والشوارع لفها ثوب الضلام اللي هجدها=والبيوت اطلال من عقب المحبه والسكينه
والشتا واليل والبرد وسما يصرخ رعدها=والعيون اللي ورى الشباك مذعوره حزينه
طولو بالكهف الاصحاب وبقت روحي وحدها=كنها في كوكبٍ ثاني خلا من ساكنينه
الوداع اللي بعلم لعيني اعبر من رمدها=والوداع اللي بلا علم لقفص صدري غبينه
والوداع اللي بلا رجعه علي امر وادها=والله انه غرغرة سم وسكاكينٍ سنينه
والعنود اللي جفيت الناس والدنيا بعدها=مدت الفرقا لغاليها وهي تعطي الثمينه
وينها !! كيف اتركتني ؟ ليه ماجت في وعدها ؟=والقمر لاطل خابرها تجي بيني وبينه
رحت انادي واتلمس في مهب الريح يدها=كني حصانٍ بلا صاحب طوى البيداء حنينه
رحت اصيح الصبح وينه؟ والعرب مارد احدها=ماسمعت الا صدى صوتي يقول الصبح وينه
كنهم من يوم ذيك الشمس غابت عن بلدها=طلعوني في النفود وصكو ابواب المدينه
كنهم من يوم ذيك الذاهبه مااحدٍ وجدها=كل رجالٍ من الشرهه قلع في الدرب عينه
اثرها ماتت وماتت كل فرحه في مهدها=والربيع اقفت به اللي كانت التاج لجبينه
جاورت عقب الحدايق حفرةٍ مااقسى لحدها=حفرةٍ ماني مصدق كيف ضمت ياسمينه
للحزن فيني مثل ماللطهاره في جسدها=ويش اسوي لا فتشت اللي لها وسط الخزينه
زخرفت حلم وبنت له مسكن وسمت ولدها=آه لو غرد ولدها في خميلة والدينه
عاهدتني وظفرت بيمينٍ اقوى من عهدها=والصبي لا خير فيه ان كان مانفذ يمينه
ماتتقى عن رثاها عرقٍ اكتض بشهدها=ولا تبقى خلف قضبان الجفن عذراء سجينه
كيف عند العالم ايام العزى مااحصى عددها=ولا انا طالت شهوره والله اعلم كم سنينه
لا الثرى فيها نبات ولا المشي خفف نكدها=لا السماء فيها طيور ولا البحر يمه سفينه
لا القمر هذا مساه ولا العصي هذا رغدها=لا الزهر هذا شذاه ولا الذهب هذا رنينه
قالو الشيخ الفلاني مرجع القوم وسندها=قال يبشر بالعوض والعلم جينا ناقلينه
ساقلك بدر البدور اللي نشدها من نشدها=جادلٍ هزت عروش وخيبت روسٍ ذهينه
قسمها في رسمها في جسمها الا في رشدها=واسمها ان جاء للغضب قومه على الالسن رطينه
اترك الناي وعطية شيخنا غن لسعدها=وانبسط ياعم وانس اللي ورى التربه دفينه
قلت ولصدري تناهيدٍ تروّع من شهدها=آه واويلاه من يجلب على قلبي ضنينه
خلو اغلى ذاهبه ترعى ربيع اللي فقدها=والعطاء راعيه مااحدٍ صوبه الله لا يهينه
لو ضمنت الجنه وتفاحة القلب وشهدها=قلت من بكره عسى مجنونها تاقف سنينه