البارحه بالليل لجن الأظلاع = لجت سباعٍ ومن عشاهن مقاوا
لجن وهاضن تالي الليل باجضاع = من القوا قامت ضلوعه تعاوا
ولجن ضلوعه ضاربه ماص الاشلاع = وقامت عليه من الليلي غباوا
في راس مرقابٍ طويلٍ إليا زاع = قامت تجاذب له من الراس ماوا
قامت تجاذب له سريعات الأولاع = يا تقل وسط القلب نقرة فضاوا
جِذب لهن سرحان من عقب ما جاع = بادباحت الجوزاء ونجومه تهاوا
بادباحت الجوزاء ورقيبة والأتباع = وعقب العواء راحن خصام وعداوا
وتفرقن من راس عيطاء بالاسراع = وقفن كما يقفي هبيل الجلاوا
ولجن ضلوعه والمخاليق هجاع = لجت هبيل ٍ ما لعقله مداوا
لجت هبيلٍ فارق الحي باقلاع = اللي عليه الدود قام يتهاوا
وزبنتكم يا امير ياعز الافزاع = وزبنت حرً من مواكر ِ نداوا
وتفيدني يا امير عن درب الاوضاع = وهذي حياة العبد كله بلاوا
وأنا دخيلك عن طواريق الاخلاع = وادخالت ٍ تصعد لسبع السماوا
إدخالتن تنجيك مع درب الأسناع = يوم الحساني يبعدن ْ الخطاوا
وادخالتن لبوك وامك بالانفاع = وباب الرجاء مفتوح بليا حراوا
وفي حاه ربًً مطلع آدم من القاع = وهو الولي راحم يتيم العجاوا
ويالللي رحمت ام العباير بالاوساع = في صكت الفخذين لأمره تساوا
ولفتت نظر يا امير لا جتك الأوجاع = تنظر بحال اللي من الشوف ضاوا
الضغط فوق الخمس والراس ولاع = نسبه من المقطوع وفشل الكلاوا
وابني دخيلك يوم وزنات الأوضاع = يوم الجنايز باللحد له تصاوا
في جاه ربً حافظ غيب الأوداع = شيء كتب له ذنب وشيء صحاوا