قبيلة بني رشيد - وصيت مرشد البذال لابنه .....ق.ش

صباح / مساء رضى الرحمن عليكم

يالله يارب الضعوف المساكين ...... ياللي لك المخلوق يحسن صلاته
تستر على غوش صغار مكفين ...... أكبرهم العارف دليله عصاته

لا ياعيالي كل أبوكم حبيـبـين ..... عندي وعند الناس كلن وذاته
عندي غلاكم يدفن الزين والشين..... وعند العرب كل تشاف خملاته

ياعبيد انا خابرك ورع لهالحين..... داو بغبات الجهل وظلماته
لا شك علمي لك محبة وتفطين ..... تسمع الوالد وثبت وصاته

ياعبيد انا بوصيك مني بثنتين ..... ثنتين هن سو البشر وحسناته
انذرك لا تبحث سدود المغبين ..... لا تجهر اللي غارق بغفلاته

ترى النميمه تمحق الرزق والدين..... والمنزل العالي تهدم طبقاته
لا تحسب أهل الظليمة بخيتين ..... كل يوافق ما عمل في وفاته

وانذرك عن حق الضعيف المسيكين ..... اللي على حقه يهل عبراته
ترى الضعيف لا غدى الليل ليلين ..... يدعي وعند الله توافق دعاته

الظلم فان الظلم يفنى السلاطين ..... ياويل راع الظلم من مقبلاته
وانذرك عن ربعة رخوم هياسين ..... اللي سوالفهم بوده وهاته

ياعبيد الاقشر لو صفى لك نهارين .... ثالث نهار جاك يرفع قناته
والله يا عندي ربعة الناس الاقصين ..... ولا صديق يبلشك في حياته

ترى الرجال بهم فهود وحياوين ..... جاك الكلام اللي صحيح ثباته
وان كان ماتدري ترى الناس دارين ..... الرجل مدحه بالمجالس طراته

رجل تعلق به رجال مسمين ..... عز الرفيق ولابته ولحماته
ورجل تشوفه جسم وعيون ويدين ..... ولولا الشعر ماتفرقه عن خواته

كم واحد في البيت يضرب بسيفين ..... وان جا حزم كلاب يكبع عباته
والحلم عند الغيض ينحى الشياطين ..... يكفيك شر ابليس هو ودحراته

لشاعر المرحوم: مرشد البذال

مع تحيات شطحاات