أفضل القصائد الغزلية في الشعر النبطي
لاتفوتكم
\
الله يوفق مثلك الله يخليه.
........................كأنك نويت الصد والهجر وياه
غالي ولك بالقلب شي ومخفيه
.......................اكبر من اللي بالضماير تهقواه
في غيبتك قلبي ترى الهم صاليه
......................واسهرت ليلي بين ونه وويلاه
البارحه طيفك مع الليل أحاكيه
......................يشهد علي الليل والنجم يصغاه
فكرت ويا الليل مبدع قوافيه.
.................. ...مسحوب طرقي والقوافي تقفاه
والحزن فوق القلب والهم مقفيه
...................و ليلي غدا ليلين والصبر مقواه
اكتب شطروالشطر الأخر نجاريه
........................شاعر تحده والليالي توطاه
أجزل بيوت الشعر وحكم معانيه
......................ولا هزيل القاف واضح ثناياه
ياللي حرقت القلب منهو يطفيه
.....................النار نار ٍ تتعب القلب واحشاه
يا مانسيت اللي من الناس نغليه
........................ولاعاد به شي ليا حل طرياه
استر عيوب الناس والطيب أبديه.
...................وش خانت اللي ماستر عيب رفقاه
امسٍ وقبل البارح القلب اهنيه.
......................أمسي مع الفرحة وصبّح بفرحاه
في شوفتك افرح مع اللحن أغنيه
.........................وطيفك يسلي كل طرقٍ بمغناه
قلبي كثير اللي من الناس ترجيه
......................وأنا الذي قلبك من الناس يرجاه
لاتحسب ان الصد صعبٍ تحديه
.......................ترى الزمن يشكي ومثلي تحداه
انشد وتلقى الليل تقصر مساريه
.................صدر الزمن يشكي من أقصاه وأدناه
راحت هجوسك مبعده في هقاويه
.....................انشد جبال اطويق واللي ترقاه
تلقى زمانك قاصرات ٍ لياليه
.....................هذا الصحيح وتدمع العين فرقاه
وأنت الذي لاضاق صدره نراضيه
...................نتعب على شانه على شان نرضاه
ولا أنت تدري من زعل عيب اصافيه
.....................يادارس اطبوع المشاعر وتدراه
يا ما لقيتك تشكي الهم تشكيه
..................وجهك عبوسٍ تشكي الحظ برداه
ياللي خذيت القلب وشعادكم فيه
....................رده ترى قلب العنا وافي اشقاه
أرفق بقلب هالليالي تفاجيه
.........................يابو ثمانٍ مرهفاتٍ مصفاه
أنا عشقت وعشقي محدٍ يظاهيه
................جيتك على الفطرة وذ القلب يغشاه
إحساس من قمة شعورٍ وطريه
...................عليك ياللي ناسي القلب تنساه
في كفي سيفٍ للعواذيل مرهيه
................وفي صدري درعٍ لسهوم المصلاه
ياقلبي الليله على وادي التيه
...................جريت ونه وألف ونه من الأه
اسمع صدى صوت المعنى بتاليه
....................اضحك وأقول الله يعين الذي تاه
والحق أنا اللي تايهٍ في دواهيه
.......................مجراك نار تكوي القلب تكواه
باغيه قلبي والمشاعر تناديه
........................قلبي عشق قلبه مع الليل ناداه
يفداك منهو يجمع اريال وجنيه
.........................يفداه وجه الطيب والعز يفداه
مثل البواخر لا رست في مراسيه
...................حبك رسا صبح ومسا ابكل مرساه
بين الظلوع الحدب حبه ابنيه
....................واكتب عليه من الغلا شي يزهاه
لكنّ كيف القلب هذا امتناسيه
...................ياصرح مدري جرح ياجرح ودواه
يمكن صواديف الليالي تحاديه.
...........................ولاّ تغلا والغلا في مزاياه
لكنّ قلبي ماصبر ليل مشقيه.
.......................دنت هجوسي والبلا في محاتاه
همٍ على قلبي وهمٍ يباريه
...................... .ولا جروح القلب صعبه تبراه
البارحه قلبي من اللي يداويه
.......................ياكود وجهٍ يبري الجرح ملفاه
حامت شياطين الشعرمن بلاويه
...................وسرحت في عالم صعيبٍ بمسراه
هلّت دموع العين هلّت غواديه.
.....................على الذي قلبي من الناس بداه
اكتب حسين القاف وارجع ومحيه
.......................جف القلم حبره ولا نافعٍ ماه
شطرٍ نهليبه وشطرٍ نحييه
..................وشطرٍ على ماقيل ملعون مثواه
هذا حبيب ولا عليّه مشاريه
...................عشره قديمه والحكي توّ معناه
ترى الوفا والطيب حق ٍموّفيه
......................ترى الغلا والحب حق موّفاه
من باعني بعته وتقصر خطاويه
................مدعي عليه ادعي عسى الله يرعاه
لا ياندي العرض هذي تواصيه
.................أبوي أنا اللي وافي الهرج بوصاه
وأنا الذي من يشري القلب شاريه
.......................هذا محله قلبي واسعد بلقياه
اقلّطه في صدر قلبي وهلّيه
..................أرحب هلا وأهلاً وننحر له الشاه
ونقدّم الفنجال والهيل حاليه
...................أشقر مقره من ورى الهند مجناه
يعني انتهى المشوار لاباس ياهيه
.................خمسين بيتٍ شاعر الجن سواه
وخمسين بيتٍ تقفي اللي مسويه
..............مسرج خيول الجن واهجيك بحكاه
من قدّم الطيبه نرفّع معاليه.
..................ومن قدّم السيّه مع الدرب دسناه
أدعيك من قلبي وأنا الغير مدعيه
.................مشتاق أنا والشوق وشلون ابنهاه
في داخلي حربٍ من الشوق مذيه
..................والصبر طعمه مر وكيف اتحلواه
من لايعرف الحر لاشك يشويه
.............أخطيت في حقي وأنا ارجيك رجواه
أنا الذي منهو رقا فوق اوطيه
........................عليك ياللي كل رجمٍ تعلاه
لا تحسب إني بسهر الليل مقضيه
...................جاتك مثايل وفهم القول وأقراه
قبل أمس أحبه وأفتخر في تلاقيه
.................واليوم هذا مثلي صرّح كرهناه
الخط الأحمر ليه نفسك تعديه
.....................قد قلت الك ومحذّرك لا تعداه
رادي ومثلي لاحشى ما ترديه.
..................درب الردى لارحم منهو تمشاه
كان الغدر ميزه وتفخر بتاليه
......................الله يعينك تالي الوقت عزاه
تصبح مابين الناس محدٍ يدانيه
.................قبلك صفق يمناه في كف يسراه
الرادي اللي يمشي محدٍ يراعيه
...................هذي حياتك بأخر الوقت وتلاه
ياللي تقول الحب وافي ومرخيه.
.................حبل الوفا تقصره وشلون ترخاه
الحر لامن فز يكفخ جناحيه
..................أنا عزيز النفس واللي ورثناه
المرجله والطيب لازم نقديه
....................ماني شحيحٍ تايه أرداه برداه
واليوم ياوجهٍ بدا فيه وشفيه
.....................إلاّ عرفت القلب هذا ومرضاه
لا يالذي قلبك من الغدر تحشيه
....................هذا وأنا مهجيه وذكر حلاياه
.لكن علي الله ماعاد أنا ارجيه
....................في رجعته همٍ ولا عاد نبغاه
فيه البقا واللي حلاته نعزيه
......................أقولها من بعد هذا عرفناه
يرثيه وقت الحب والحال ترثيه
....................كم واحدٍ قبلك ترانا رثيناه
هذاك غالي والله اللي متوفيه
..............ولا أنت لا مثله ولا وجيت شرواه
يشهد له التاريخ حضر وبواديه
.............يرحمك ياللي وافي الطيب والجاه
وإنتِ بديتي بالغدر من مواريه.
...............عمر الغدر شاين ولو زان مرباه
درب العنا ياللي نويتي مساعيه.
...................خايب وظنك ضايع ابكل مسعاه
فيك الغدر وافي على كل أراضيه
.................ثوب الغدر ما والله يومٍ لبسناه
باسم من انزل محمد وحاميه
....................الواحد القهار ربٍ عبدناه
ماني على صدك ترى القلب اعنيه.
................وشعاد يعني لو مثلك هجرناه
القلب يسلا مع أهل الطيب اسليه
..............عندك خبر كلٍ على كيف مشهاه
اقفت ليال الحب واقفت لياليه
..............والشوق روّح لاترجى وتنصاه
أطغيت حتى القلب بالغدر معميه
..............الصبح لك قلبٍ مع الحب يهواه
والليل لك قلبٍ من الغدر ماليه
.............كنت الأمل والنفس مثلك تحراه
ماني صغير السن مثلك يخطيه
..............أخطيت ياللي كل شيٍ تخطاه
اللي رقا للخير ربي يجازيه
..............جعله بخير وراعي الطيب حياه
واللي يحب الشر منهو يخاويه
...............ياكود مثل الطبع لاشك خاواه
العقل راس المال وشلون اقديه
.............في ذكر ربٍ عالي الناس تخشاه
جفت عروق القلب جفت خباريه
...............لاتحسب إن الحر مثلي تشواه
حرٍ وفي وصفه طوالٍ مواميه
...............أنا عريب الجد ياضايع اجداه
أخطيت في قلبي على الكيف مهديه
.............أنا اشهد إني ظالم القلب وسقاه
أسقاه من ظيم الليالي ومسقيه
..................همٍ وكل همٍ موفّي زواياه
الصدر لا من ضاق بالقاف أواسيه.
..............شاعر وومّر كل شطرٍ كتبناه
اكتب حروف الشعر من كيفي ووفيه
..............والشعر وهبه والعفو ماشريناه
وغيري كثير الناس لشعر تنخيه
............الناس واجد يأهل العرف تنخاه
لامن كتب بيتٍ تعزوا بعزاويه
...............مسكين ياللي كل شطرٍ تبناه
وأنا احمد الله كل شطرٍ موازيه
...............لاطاح شطرٍ قام خيّه توازاه
العقل وافي واحمدلله مكسيه
............بالطيب والمعروف حنا كسيناه
حاضر بحاضر يأهل الحسد أسويه
..........والموت حقٍ يحصد العمر يفناه
متين شطرٍ وافي العرف محصيه
.........ساعة وثلث الطرق حنا بدعناه
وختم قصيدي عد ماهب ذاريه
.........على النبي اللي طريقه مشيناه


مماراق لذائقتي للشاعر المبدع/سعود العازمي