اللي بعد ما غاب عنكم بكيتوه=كم صار له معكم ولا احد درا به

يا ليتكم ملتو عليه وسالتوه=سؤالكم .. يمكن يغير جوابه

لكن خذيتوا كل شي وتركتوه=(لضيقته .. ولعزلته .. واغترابه) آآآآآآآآآه

اليوم بس اليوم يعني فقدتوه=وهو له سنه من يوم مااقفت ركابه

لو كان فيكم خير كنتوا ذكرتوه=قبل الزمن يسرق ملامح شبابه

يعني عشانه ما اشتكى ما سمعتوه=هذا الخطا اللي ما حسبتوا حسابه

ما قد عرض شكواه حتى على اخوه=شلون اجل يشكي عليكم صوابه

طبعه يموت ولا ألحَق الغيم مشروه=عزة ضماء ولا مذله سحابه

اقفى عساه مجار من كل مكروه=راسه عزيز و راس ماله ثيابه

وعفة يديه اللي خذاها من ابوه=وصبره على جوعه وقله زهابه

خله يتوه بكيفه احسن و لا يتوه=بيدين ناس شرعها شرع غابه

الذيب فيها من سلك درب مشبوه=واللي ما هو ذيب كلته الذيابه

يا ما انبنى من حلم فينا وهدوه=وقت غريب وناس اكثر غرابه

صدق القناعه كنز لكنهم افنوه=و حتى الاصابع علموها تشابه

ما دام صوتك من ورا الباب مسفوه=يا ريح هذي باب من سد بابه

و الصاحب اللي غاب لو هم تناسوه=قولي لهم لا يفرحون بغيابه

هم حصلوا في غيابه اللي تمنوه=بس الوعد لا من برى من صوابه

اقتباس من مشاركة (فارس الرشيدي) (المشاركة 2304115) ذائقه رفيعه واختيار موفق سلمت يابوفيصل وياليت نعرف صاحبها

اقتباس من مشاركة راسبه بالحب (المشاركة 2304116) يالله روعه الابيات كل بيت قصيده لحاله .. سلمت الايادي على النقل المميز .. صح السان شاعرها ..