ياعبيد قلبي من هوى الزين ملتاع=عزاه ياقلبٍ هوى الزين لاعه
طبيت في حبه ولامنه مطلاع=وعذلت انا قلبي ولامنه طاعه
وفز الخفوق مصوبٍ بين الأظلاع=يشكي من الغرو المدلل طباعه
يسوقني حبه كما سوق طماع=يريد من بعض التجاره طماعه
عجزت لا اقعد يافتى الجود بالقاع=ألوج كاللي ضايعٍ له وداعه
يخاف يتهم بالأمانات ويشاع=وتطيح قيمة سمعته بالجماعه
والجادل اللي حبها كمل الصاع=اشفق لشوفه ساعةٍ بعد ساعه
سودٍ عيونه كالدرابيل ووساع=تزيد من نار المولع ولاعه
والله اكبر ياحلا الزين واطباع=سبحان ربٍ جمله في طباعه
وأظن مالي من هواء الزين منفاع=دونه خبيثٍ رابين بالقطاعه
عودٍ سبق له للمحبين مناع=عن نية المعروف طاون شراعه