والله اللي ضاعت ايام الشباب =مثلما ضاع البحر بعيون "سلمى"
كن عمري فص من ملح(ن) وذاب =بين موجات البحر والليل ظلما

خمسة عشر عام مشوار اغتراب =كلها حب وصور وارقام واسما

من عذاب الحب للحب العذاب =ومن عمى الاحباب لاقصى الحب الاعمى

ما لقيت الا مفاتيح السراب =ونبع ماي(ن) من يبل شفاه يظمى

رحلتي وش جبت منها غير ناب =واصبع ابهام(ن) اعضه لين يدمى

من وانا طفل(ن) وانا اكتب بالتراب =اول حروف اسمها لثغات عجما

ضاع مفتاح الفرج و"ايوب" تاب =ومن تشق نطاقها لعيونه "اسما"

كل ما انشد قلبها ليه الغياب =قام يكذب لين خلى الظهر عتما

واستثار بعينها دمعة عتاب =تسبق اللي من بنات الريح دهما

تغسل اطراف الخطا يصبح صواب =ولارتعاشة رمشها مليون مرمى

قالت: اسأل عيني افتحها كتاب =قلت: مهما سلت قالت: إيه مهما..

كيف ابانشد عين سلمى عن جواب =من يدور الاجوبه في دفتر الما

والله اللي ضاعت ايام الشباب =طالما هو قلب" سلمى" قلب "سلمى"