دار الكلام... وطال بيني وبينك
والشوق معطينا مفاتيح بيته
ياللي تسوق إحساسك ... الله يعينك!!
لقيت فيك إحساس ما قد لقيته
لا ما سمعتك .. يوم سولف حنينك
واللي يدور بخاطري ما حكيته
مدري خذتني منك طلة جبينك ؟!
والا إنت معجبك الخفوق وخذيته؟!
والا إشغلتني عنك لمسة يمينك ؟
يوم احتوتني بالدفا .. واحتويته
شف كيف تغريني سواليف عينك !
وأقرا بها اللي من زمن ما قريته
سافرت بعيونك على وجنتينك
والدرب من بين الملامح مشيته
وادري يمتعني متابع يدينك
والشوق حاضر .. وإن بغيته دعيته
وأدور الراحة علي راحتينك
وأقول ليته .. ثم ليته .. وليته
ويا ليتني ما أقول بعدين ( وينك )
وإن قلتها .. ياليت من غاب جيته
وإعرف رضا الله من رضا والدينك
وأنا رضاي اليا رضي من هويته
سولف علي .. الله معك لا يهينك
والمعذرة كان الغلا ما قويته
أكثر كلامك ذاب من شفتينك
واللي خذيته منك شفني عطيته
عيد الكلام!! وهات قصة سنينك
ويا ليت لا عدته عليه نسيته ..
