ماهي غزل .. والا مفارق مواليف = والا جفولٍ .. غربلتني معاها
والا على المقفي .. دموع وتحاسيف= والا غرابيلٍ .. كفـى الله وذاهـا
ياهاجسي .. مالك ومال السواليف =سرح مغاتيرك .. وبَّين مداها
فتح .. صناديق الشعر والمظاريف = وأظهر .. هجوسٍ بيَّن الله خفاها
وانصا الذي .. ماطربقته الملاقيـف = ولد الرجال .. اللي تعز قصراهـا
شوق .. القلوب الطيبه والمراهيف = سم الكبود .. اللي تزايد غثاها
ذيبٍ .. تهادى منزله بالمشاريف = ذيبٍ .. ليا ناش الطريـده كلاهـا
له فزعةٍ .. عند أشتداد المواقيف =يطرب لها الساري .. ويرقب سناها
عبدالله .. اللي ماحسب للتكاليف = واللي .. نواوير الضماير سقاها
من عقبه .. الديره هبوب ومعاصيف = حتى .. بهيم الليل عقبه غشاها
ماعادلي .. فيها ربوع ومواليف = عندي .. تخالط صبحها مع دجاها
واليوم .. هلتله برأسي تواليف = وأزدانت .. العين الشقيه كراها
عل .. الليال المقبله والتصاريف = تروي لنا الجمه .. وترهي عشاها
ويعيذه الله .. بالليال الصواديف = شر .. الظروف القاسيه مع بلاها
وتم الكلام .. اللي بنيته على إيف = شطراً على أيفٍ .. وشطراً على اها