قبيلة بني رشيد - يا ذهـب.. يا عقـد مرجان.. يا فضه

.

لو عيوني تذرف الدمع وتكضه
* وش يفيد العين من كثرة بكاها

السبايب كلها جادلٍ غضه
* جل شان اللي خلقها وسواها

يا ذهب.. يا عقد مرجان.. يا فضه
* درةٍ لا جيت أو صف حلاياها

يتعب السبّاح في الموج ويخضه
* يمكن الدره ورا الموج يلقاها

إن لقاها قالت الناس من حظه
* وإن غدت تصفق يمينه بيسراها

ذكريات العين يوم الشعر فضه
* وبان بدرٍ مكتمل في محياها

في ملمٍ وسطه الناس مكتظه
* حارت الأقدام عيت تعداها

قمت أفرك راس الإبهام واعضه
* لحظه لا يمكن الفكر ينساها

ما يلام القلب لو جض له جضه
* كل ما يطري على البال ذكراها

مض سيفك يا مليح البها مضه
* خل عين السحر تكثر ضحاياها

.
.
.
#شعر
==============
للشاعر / ( جهيم بن ثابت الذيابي )

.