سلام يا يوسف الشطنان=يا صاحبي يا كحيلاني
سلام من خاطرن ولهان=واظن ماجالكم جاني
وين انت يامبدع القيفان=دكتور في كل الاوزاني
ياذيب عبس ادحم الميدان=ماينقصك سيف وحصاني
اشوف لا حامت العقبان=بانت لنا قاصي وداني
هتلر فتح للبشر بيبان=بهذلبها الشعب الالماني
والضربة اللي على اليابان=تحركت منها الاذهاني
واكبر مصيبه على الانسان=لاصار ملحد و علماني
والسلعة اللي مع البدوان=اتقول يا وين عنواني
والبدو تنزل على الوديان=تدبير من رب الاكواني
والحوت يمشي مع الحيتان=ولاعذرب الصغر شيهاني
و مافيه زودن ولا نقصان=واليوم وقتي تحداني
وياراعي النقل يالعمران=حظي على وين وداني
العام في موقف الشوشان=واليوم ممشاي وحداني
مذكور بالخير يا حبران=عسى تساقيك الامزاني
اسلم وسلم على الاخوان=ومنهو سكن حول حبراني
وختامها المسك والريحان=يهدى لذربين الايماني

أبدا وبسم الله الرحمان=رب البشر عالي الشاني
من هاجسن يرجح الميزان=ومحاورن كل الادياني
يا مرحبا عد نجمن بان=ياصاحبي يالعلياني
ترحيبتن من وسيع بطان=يرضابها كل زعلاني
وطرق الهجيني يبا طربان=يسري على ليح ليحاني
وبرق الحيا منوة العطشان=وسهيل في منزله باني
ياوسمنا اللي على القعدان=مايجهلك مكرم العاني
والخيل ما تجهل الفرسان=افعالها بكل ميداني
والحر تكفخ به الجنحان=والبوم في منزلن داني
والطلقة اللي على النيشان=من بندقن رميها زاني
مافيه نارن بلا دخان=هذا مثل واسأل الجاني
ياصاحبي كان ياما كان=تصريح من ماض الازماني
مرسي مصر حزبه الاخوان=و بلير حزبه بريطاني
والمسلم اللي سكن لبنان=اصبح مع الوقت نصراني
وترى الخميني كبير الضان=اسقطك يا شاه الايراني
والحجة اللي بلا برهان=يا قربها لجر الالحاني
و يابو خلف مكرم الضيفان=اخاف تسلى وتنساني
لا صرت في ديرة سعيدان=سلم على طير حوراني
وصاحبك في ديرة الشجعان=في ديرة الذيب سرحاني
العام خوة مع اهل الشان=واليوم كلن تعداني
وخوتك يا ذيب يا بطران=خوتك تشرى بالاثماني
وخوة رشيدي لنا عنوان=ايقولها فلان وفلاني
لا هان راع الوفا لا هان=لا هان من قلب ولساني
واهل الوفا للخوي مزبان=مزبان من كل قوماني
ولا صرت يابو خلف طنيان=سطوتك بالسيف شاماني
وشمر وعبس الوفا جيران=من قبل توحيد الاوطاني
واختامها والكريم معان=نخزيك يا كل شيطاني