عبس العريقه
 

هيـه ياللي تغطرس دربنا من يعيقه
مانحسب الخسـاير وقت لامال مايل

والعــهد ،،مانخونه والعلاقه عميقه
عنـدنا ماتغير مـثل ضلعـــان حـــايل

وان بغيت الفخر بالاصل عبس العريقه
ونفتخــر في نسبنا بالاصل والفعايل

لابتي بالشدايد سيـــف لامع بريقــه
جمــرة ماتهاب المــــوت لاطال طايل

ان بغيت الفخــر والعــــز حنا فريقه
ولاهو قصور برجـــال الوفا والقبايل

حذر اللي يحسب انه يفوق الخليقه
ناقصاً عقل وهروجه هــزال وهوايل

نسمع النبح زايد مابعد نشف ريقه
ودايم الكلب ينبح لو بعـــز القوايل

وتاركين الذليــل ولــــو تزايد نهيقه
طول عمره ذليل وعايشن بالتحايل

والهذاري هــذاري ماتزيح الحقيقه
فعــلنا راســـخ وتاريخنا لــه دلايل

بعض الاشكال ماودك يسولف دقيقه
ماتربى ويبقى ضمن هـــاك الذلايل

ندري ان اسمنا مثله لايمكن يطيقه
رمح وسط النحر ياهو عمله عمايل

ومن يبا يدس راسه مافخر به رفيقه
والله انه عليهم عــــار للحمل شايل

ولايهذري المهذري غير من حر ضيقه
يونس النــــار تكوي كل ضلع متمايل

واللي بصدره النـــار اللهوبه حريقــه
مــن فعايل زهير سلالة عن سلايل

يذكــر الله ويبعد فعــلنا من طريقـــه
وماضي الوقت راح وضيق الايام زايل

والرشيدي بفعله يفتخـــر به صديقه
وماقفه مع خـــويه مايشوفه جمايل

وماتضيع الحقــــوق ووثقتها الوثيقه
والتغرض ماعمره صار ضمن الدلايل

والخــتام احمد اللــه عالمآ بالخـليقه
وفي ذرى اللي يحق الحق لاعال عايل

صلاح حاضر