قبيلة بني رشيد - يالله يالمعبود يارب الارباب

يالله يالمعبود يا رب الارباب=يالواحد الخالق عزيز الجلالي
اللي رجاك ويطلب رضاك ماخاب=ويوم الحشر ماغير ضلك ظلالي
يسمع دعا خلقه وليمن دعي جاب=ونصر نبيّه في نهار القتالي
في بدر والخندق ومؤته والاحزاب=مابقي لأهل الكفر عزّ او مجالي
يامرسل محمد الى الخلق بكتاب=أنك تنجينا بيوم السوالي
يومٍ تضيع به الهقاوي والانساب=وكل البشر حضّارٍ أول وتالي
في ماقفٍ ماللبشر منه مهراب=من شدته هيلت كبار الجبالي
ولاتنفع التوبه بوقته لمن تاب=إلا العمل عبر السنين الخوالي
يومٍ عبوسٍ مالنا عنه مجناب=والريق ينشف مايقى له بلالي
الرجل ينسى ابوه وامه والاقراب=ويقول وين ألقى نجاتي لحالي
من قوة الأهوال الأطفال شياب=والكل جاله بالمصير انشغالي
المؤمن الصادق يقابل بترحاب= ويدخل جنانٍ تربها مسك غالي
ويسكن قصور وبالحرير البس ثياب=ويدخل نعيمٍ مالوصفه مثالي
والكافر الفاجر يقيّد بالاعقاب=ويرمى بنارٍ في لظاها اشتعالي
واذا نضج جلده يبدل والاعصاب=ولا ينفعه لو يفتدي بالعيالي
ياويل من طبعه منافق وكذاب=طاع الهوى والنفس واهل الظلالي
وياويل نقّال النميمه ومغتاب=يوم الحساب وكشف ستر الخمالي
دنيا العنا هذي تقلب تقلاب=هاضت هجوسي الراس مما طرالي
والوقت هذا وقت خاين ونهاب=تغيرت حتى سلوم الرجالي
لاذناب صاروا روس والروس الاذناب=والناس ما تفرق حرام وحلالي
ماعاد يفرق صقرٍ وبوم وغراب =كلش طيور تحوم روس العوالي
لها مناقيرٍ وريشٍ ومخلاب=والفرق بيّن في نهار الفعالي
واحد اذا جاء الجد للصيد جلاب=ولاخر على الجيفه يحط الرحالي
والناس مثل الأرض وديان وهضاب=وناسٍ ذياب وناس مثل الرخالي
والبعض كلمه زايده مالها اعراب=مثل الهباب يطير عند النخالي
نصيحتي يامن يدور للاصحاب=احرص على صحبة كرام السبالي
ترى الوفي للضيف بالنار شباب=ولاهو من اللى يحسبون الريالي
ولاّ الردي في ساعة الضيق ينساب=ماهو من اصحاب اليدين الطوالي
واحذر من اللى للسواليف حطاب=مايعرف ايش الهينه والجزالي
تلقاه للحوم الرجاجيل قصاب= وعند الحقيقه مايساوي نعالي
حرب القريب مطيع للناس الاجناب=يصبر على الزلات صبر الجمالي
ولا تأمن اللى يحتلج كنّه الداب=أذهن لخطو الرجل فوق الرمالي
وتمت وصلى الله على سيد الاعراب=محمد المختار عدّ الخيالي