معذور لو ذبلت اهدابي وعودي نحل= مادام الاقدار في وجهي تطش الجروح
في خبت الاحلام ناقه وبضلوعي فحل=يــهـدر ويزبـد ولـــه بين الــحـنايا جـمـوح
من يو صار الغموض يلف وجه المحل= وانا اعصر البال وابحث عن مجرد وضوح
مالي وماللزمان اللي سرى واضمحل= يـبـوح والا عـسى عـمـر الـزمـن ما يبوح
لو كان للنخل موقع في سواد الوحل=ما كان مـضرب مـثـال ابن الحـلال الطـمـوح
اذكر وانا فالطريق ومر موكب زحل=شفتك على العرش بالوجه الحزين الصبوح
في معصمك نقش حنى وبهدبك الكحل= وبعاتقك رعد غيم ونوض برق يلوح
وبخدك الصبح وبثغرك ملاذ النحل= والمسك والعود الازرق من عروقك تفوح
قلت ازرعك في رصيف الذاكره لو رحل=صوتك , وصار المكان انسان من دون روح
لكن صوتك تربى داخلي واستحل= نزوح فكري , وفكرت استميل النزوح
واحل عقدة ومن عقّد حباله يحل=قدام لا يعقده حبل الزمان الشحوح
جيت ابدوي على العشبه نزل وارتحل= والبدو من حيث ماينبت حياها تروح
انسان عابر شرب وجهك وعوده نحل=جا لك بلا جرح واقفى ممتلي بالجروح