أخذيني بحضن وصلك لاتخليني=ياأول كتاباتي أنتي ..أنتي آخرها

على كثر ماكتبتك في حبر عيني=صرتي فتاة اتملّل من مشاعرها

هيمي بشعري وكوني لاقريتيني=عذراء تشيل بصدرْها روح شاعرها

إليا اسألوها الأوادم عن عناويني=اتقول مدري عن أيّامه ولااذكرها

أبي السهر يفقد طيوفي ويبكيني=وأبي الأماكن عن غيابي خواطرها

بنسى جميع القصايد لاذكرتيني=وآخر قصيدة عن غيابك ابنكرها

ولو قلتي أعشق شعورك لويحاكيني=والله لأنذر لك أبياتي واسخرها

ضمّي بقايا شتاتي لاتبقّيني=مابي ولاحاجةٍ منّي أدوّرها

ضمّيني أكثر وحبّيني وغطّيني=بنام وأحلامي بعيني اصوّرها

ولانمت في حضن وصلك لاتصحّيني=بموت وآخذ معي ذكرى اسامرها

روحك معي وأنتي اخذي شعري ارثيني=كوني قصيدة تعيش بروح شاعرها