يا قلبي اصبر ملاذ الروح زعلانه= فجّر سكونك وشق الصدر وهدومه
والصدر شمّع بعد ما تثور بيبانه = واجلس معي للقصيد اليوم ملزومه
اسمع وش اكتب لها بالشعر وأوزانه = دام استحلت .. تراب الكون ونجومه
إنسانة ٍ بالعيون .. ولا هي إنسانه = إلا نجاة لحياة ٍ ( شبه معدومه )!
في غفلة الحب بلّ الصدر واوطانه = غيث ٍ مقامه على شريانك ونومه
املأ الشرايين من وبله ووديانه = فاضت عليك وتتالى فيك بثلومه
أثره صحيح الرشيدي قال بألحانه = ( اليا استجد الغلا كل ٍ ومقسومه )
ربعّ جبلك وتربّع بين ريضانه = حب ٍ جديد .. وجذوره غير معلومه!!
قلت ابتدي به وأحبه وأرفع بشانه = دام الخلايا بختم الحب مختومه
بأوفي معه والزوايا منه مليانه = وبـ أتنفسه لين أشمّ الموت وسهومه
يسعد مساء غفلة ٍ جابت لي الدانه = يوم ارجعت لي مجرة قلب منجومه
عاشت هنا .. لولوة حبي ومرجانه= لين اعلن القلب .. حظر الغير وعلومه
إيه اشهد انك بدولة حب سلطانه= ابّى مدادك ولبّى فطره وصومه
إيه اعترف لك بحبك قبل كتمانه = وأليا كتمته توفى القلب من يومه
إيه اسعفيني وبلّي الريق ولسانه = يلعن فراق الحبيب وبعده ولومه
إيه ازعلي .. واحذري تفكير الأهانه = لاول فقير ٍ وصل بابك على اقدومه
إيه اسمحي لي طلبت القلب غفرانه = وأسلمتك امري وطحت ولا لي القومه!!
الا برضاك وكرم قلبك مع احسانه = ما دمت مؤمن بحبك وش بقى ارومه؟
اقسم قسم يالمدد ما انتي بغلطانه = وأكذب مزوحك .. حقيقة عين مرسومه!
جيت ابتسم لك ما دامك حيييييل زعلانه = وأقدم ارضاك .. قلب ٍ عجّز اخصومه
بوداعة الله يا قلبي .. روح للدانه = وأطلب رضاها بـ(قصيدة عشق منظومة