الغيم حظي والهبايب تناقلْه = وقلبي تعب .. هو رافعٍ له يدينه
آمال تحملني له وقبل لا اوْصلْه = أحتار في شكّ السحاب ويقينه
وش له أفز لبارقه .. وآتخايلْه ؟ = وقاعي ملنّه دمعتين الغبينه..!
واهنيّ من له بالزمن .. خاطر ٍ دلْه = واهنيّ من صدره يشايل حنينه
اللي منامه كلّما جاع ياكلْه = ماهوب يسبق في شهاقه ونينه
ماموّه العبرة عليهم بأناملْه = ولا كمى همّه على مصاحبينه
العمر ينعاف آخره دام بأولْه = ذكرى وليفٍ حال بيني وبينه
معوصف أقدار العشاشيق .. والبلْه = عواذلي .. تجمّعوا .. وعاذلينه
ياصاحبٍ راحت ليالي وأحمّلْه = أمانتي .. وأقول كفّه أمينه
إبطاه خطواته ياذا الموت .. عجّلْه = أقفى يلوّح بالقطيعه يمينه
ياليلةٍ .. مرّت وأنا النّوم ما امّلْه = ابعد علي من تل ابيب واثينه
البارحة غارق وأنا اقرا رسايلْه = غارق ولا حولى يبَاس وسفينه
أفرز أحاسيس المعنّا .. واغربلْه = هو عاد باقي به غلا ل (متلفينه)
والاي أحلم به .. واشوفه .. واقابلْه = وأنساب كلي في يد الشوق طينه
من فرحتى به ماعرفت أتعاملْه = تصدق اني صرت .. بيني .. وبينه
أحكي / واذا انصفت الحكي .. ما أكمّلْه = وأبدا بغيره وارجع ابحث كنينه
ماودي تروح الثواني .. وأجاملْه = ودي أفضفض كل هم المدينه
أعاتبه .. وانسى غيابه واقبّلْه = واتأمّله .. وأحط عيني بعينه
واشكي عليه من الغرابيل واسألْه = والعن على صده رضا والدينه
ياطبّي اللي روّح العمر شايلْه = ياما سألني الجرح صاحبك وينه ؟
وينه ..؟ ماكن الا نساني .. وأنا إلْه = واخطيّة .. اللي بهذلة به سنينه
وينه ..؟ يعلمني اذا آني مزعّلْه = واحب له خشمه .. واراضي جبينه
ياضيعتي حتى بمنامي .. آخايلْه = يقفي يلوّح بالقطيعه يمينه
ولاصحيت إلا على آخر رسايلْه = ( مع السلامه ) .. ورافعٍ لي يدينه