قبيلة بني رشيد - قصـــــــائد ذهبيه .....مســــــاعد الرشيدي

قبيلة بني رشيد (http://ban3abs.com/aa/index.php)

- قسم الشاعر (مساعد الرشيدي) (http://ban3abs.com/aa/forumdisplay.php?f=61)

قصـــــــائد ذهبيه .....مســــــاعد الرشيدي

اختــــرت لكم مجموعه من قصائد الزعيم

و أنا أعلم تماماً أنها لن تروي عطش عـشقكم

لإبداع هذا الشاعر الكبير ولكني كلي أمل أنها

ستخـفـف من وطأت العطش :

& يا بنت بعتيني &

يابنت بعتيني وأنا كنت شاريـك = ياللأسف رديت انا منـك خايـب
لاتحسبين القلب سهـل يخليـك = لكن تراني شفت منـك العجايـب
سبعة شهور وانا اطرد سرابـك = القلـب يعشقـك وفيـك ذايـب
طمعت في حبك ولااقدر اخليـك = غصب علي اتركك مادمت هايـب
يابنت قوليلي على كـل مافيـك = يابنت وضحي كل ذيك السبايـب
شوفي طريق العشق يابنت مأذيك = وراعي الهوى يابنت يشبع طلايب
ماتعرفين اللـي يـودك ويغليـك = ولو كان قلبك حي ماهو بصايـب
حسبي على اللي غير الجو فيـك = العاذل اللي حط فيـك النشايـب
اللي حذفني عقب ماكنت مغليـك = قلعك عني جعلهـا لـه خرايـب
دعيت ربي ياعسى الكل يرميـك = ويجيك من جور الليالي مصايـب
لانك طعنتي قلب دايـم يباريـك = ولانك عشقتيني وانا كنت تايـب

& خاب ظني بالزمان &

ويش اسوي لاطريق ولاخوي = لا قرار ولا خيار ولا مصير
الليالي تلوي ذراعي لوي = والرفيق السيف يغريه الجفير
والضياع بسكاتي يدوي دوي = اتصفق لا سراب ولا غدير
أطوي الظلما وعيت تنطوي = واشتهيت الشوف بعيون الضرير
مثل طير طاح بيدين بدوي = يلعن الطيحه ولا يقوى المطير
كل يوم آقول باكر تستوي = وخاب ظني بالزمان وبالنصير
كنت انا الصدر الحنون المحتوي = وكنت انا لـ..احساسهم سلك الحرير
وصرت انا هاك النحيل المنطوي = تلهث انفاسي ورا حلم كبير
ضاعت الحيلات حيل الله قوي = لاني الأول ولا اظن الأخير
قلت با صرخ وآخر علاجي كوي = وصلت الحلقوم والخاطر كسير
من شرب من كف غيره ما روي = لعنبو كف على المده قصير
لاتعاتب ويش اسوي يا خوي = لاقرار ولا خيار ولا مصير

& في خاطري حاجه &

انا في خاطري حاجه ولا ادري ويش ابي بالضبط = ولااني قادر اكتمها ولااني قادر ابديها
متاهة بداخل اعماقي بحر وحيره بليا شط = خذاني موجه العاتي عذابي من iموانيها
ابهرب من غموضي مير ماباليد حل وربط = ضياعي كل يشوفه حقيقه مقدر انفيها
انا مدري مكاني فوق ولاتحت ولا وسط = اسوق الرجل وتبعها وقول الله يسويها
انا عايش بها الدنيا بلاقيد وبليا شرط = مجرد ظل لايامي تباريني وباريها
انا ايامي سوى مافيه يوم اصعب ويوم ابسط = ولاادري كيف اميز بين حاضرها وماضيها
انا مشكي من احزاني ولاذقت السعاده قط = ومع هذا احس الناس وضحكهاوبكيها
انا واحد من العالم انا جمله تحتها خط = احاسيسي غريبه من بدايتها لتاليها
انا في صفحة الدنيا حروف ماعليها نقط = حياتي مالقيت اللي يترجم لي معانيها

& هـــــــــــــذي علومي &

تفهّق الليل الأدلم و الهوا ساكن = و انا هنا يا سبب همِّي و تسهيدي
في خايع ٍ من نفيض الوسم متماكن = نبته يليق بتمدري نافل الجيدي
متموج ٍ بين عشبي و أخضر ٍ داكن = و أمعفّر ٍ من نسايم جرهد البيدي
يا مودّعات السنين من العمر هاكن = تالي تباريح بالي في ضحى عيدي
و يا مدلّهات الحشا مدري وش ألهاكن = أونس بصدري مثل فوح البغاديدي
هيلن علي من رذاذ الحلم يفداكن = وجه ٍ قصر عن حياه و قلب رعديدي
يجلا غثا الكبد يوم أشتف من ماكن = شفّ العسل بين أشافي ترفة الغيدي
واللي جمعكن بوسط الصدر و انشاكن = إني لاحطب لرعدكن من تناهيدي
هذي علومي و ستر الله و عفاكن = لحقن مصاديري العطشى مواريدي
وإلا هبوبي رفيعة شان شرواكن = النقص ينقص عن الحروه و انا ازيدي
هيّضني الضلع في كبد الثرى راكن = و ان حدّك الضيم قل للضلع يا سيدي
و اركيت ظهري على ظل الجبل لكن = ماجت مواعيد ظلّه مع مواعيدي

& طلي و هلي &

قلبي على الماء وقلب الماء على شطك = الماء وانا يا القراح العذب ورادك
كم شالك الحلم باهدابي ولاحطك = والعين يرعى نظرها عشب ميعادك
يا شمسي اللي تدلي بالسماء قرطك = عن كل هالورد هذا القلب عبادك
طلي وهلي على صدر البحر خطك = وش تالي اخبار ريحانك ورينادك
الله على يوم رذاذ الندى عطك = والنور يا طا على رملك وسجادك
انا احسدك ومثلهم والااني اغبطك = الراي رايي او انه راي حسادك

& عيونـــــك وش تبي ؟! &

قلت اجمع برد ليلي وهمي وحطبي = قلتها...واقصى ضلوعي ذيابٍ عاويه
الشتا يرثع ورا البال والليل يحبي = والطعون اقفت فرادا وجت متخاويه
صاحبي لي مرّك الشوق مرّه..مرّبي = لا تجيني مع هجوسٍ تجيني ضاويه
آه يا صعب اغترابي بعدك ما اصعبي = عقبك الدنيا بعيني غدت متساويه
آتطوى كني القاع لا هجهج ظبي = كل ما اصرّد بعيني تضيق الزاويه
ليه يا درّة شبابي ولولي...وذهبي = ليه خليت الحنايا عروشٍ خاويه
يوم تضحك لي عيونك...عيونك وش تبي = كم لها تشرب نحولي ولا هي راويه
لا غلاك ..اكبر ذنوبي..ولا قلبي نبي = الله اعلم والمقابيل وشهي ناويه؟

& انا دخيل الكحل والعطر والروج &

يسعد صباحك يا بعد كل عمهوج = يسعد صباحك لو غشا الصبح ظلما
يا بنت كساب الثناء مقدي العوج = وقلوب عدوانه من الغيض تدما
لك بالشرف قدر ومدرارات وبروج = واسم تنومس هيبته بين الاسما
انا دخيل الكحل والعطر والروج = والضحكه اللي قادت العشب للما
لايزعل اللولو يموت ازرق الموج = والحلم يغرق والمجاديف تظما

& مامليت من شوفك &

مل الخجل فيك ما مليت من شوفك = واغمض عيوني عنك وانسى انك عيوني
مل الغلا في مابين بعض خوفك = يامعصبي في سماء عينك ويا هوني
اسرفت بك شوف وانت اسرفت بكسوفك = ماتدري ان بخجلك تزايد غبوني
ليتك تمعنت في نظرات ملهوفك = تشرب ملامح غلاي وتستلف لوني
يالذتي لو قدرت استوعب وصوفك = ازريت لا استوعب اللهفه بمكنوني
يالذتي يوم اشوف نخضب كفوفك = تضما كفوفي سلام وتشرق طعوني
لاتعتذر لي اكيد مقدر ظروفك = متاعب الدرب ماتخلف بك ظنوني
لو ما تجملت فيني شفت معروفك = مهما تكون الظروف تكون مطنوني
ما جيت اعاتب حبيبي جيت ابا اشوفك = وش عاد لو كنت بين الرمش وجفوني
جيت اعشقك لين ينده لي شتاء جوفك = وادفي شجونك من ابرد نار بشجوني
جيت اكتبك في قصيدي واغرس حروفك = باعماق نبضي وباعماقي وبعيوني

& عــــــــــذر سلساله &

من زمان تسولف الريح عن شاله = كل عطرٍ ساقت الريح من يمّـه
وش عليه ان مرني شايفٍ حاله = كم صباحٍ سيّل الشمس من كمّـه
كم هبوبٍ عرسهـا لثـم شلالـه = كم ترشفه الشفق وانتثـر دمّـه
لو فهم جمر النحر عذر سلسالـه = ماتضايق مايس القد مـن زمّـه
لو عيونه تجرح الشوف مختالـه = ماتمل عيون مغليه مـن ضمّـه
ليه اسمّي سود الاهـداب قتالـه = والحياه بساهي الرمـش ملتمّـه
ليلـة انـه بينهـم كنّـه لحالـه = ضاع قلب وضاعت ازوال بالّلمّه
مانشدته طيب الفال عـن فالـه = جيت ماادري تايه الراي واليمّـه
اتلمس بين الاضـلاع منزالـه = واثره اللي في ذرى القلب ماهمّه
مترفٍ يومـي دلالـه ويبرالـه = يوم كلًّ يمدح الشـوف ويذمّـه
ماتورّث زيـن عمّـه ولاخالـه = ياولد عمّ القمـر ياالقمـر عمّـه

& ذكرى الجراح &

ليتني من فرحك قريب

ليت لي جرحك نصيب

خلني دمعة بعيونك !

كل ماثارت شجونك !

خلني حزن وشقا

دام جرحك لي حبيب

ضميني ياكل الحنان

وخذيني لايّة مكان

نسيني ماضينا اللي راح

ماعاد أبي ذكرى الجراح

خلني حزن وشقا

دام جرحك لي حبيب

رديني لعيون الأمان

وأعطيني من فرحك زمان

ارويني ياقلبي الحنون

وكل شيء بعدك يهون

خلني حزن وشقا

دام جرحك لي حبيب

و مــــــــــع أطيب تحيه ...أختكم :

حنان الرشيدي