يانديبي قوم ود العلم وده=وده اللي بالكرم والطيب ضاري
فوق من يطوي السهال المجرهده=شاص مايهمه طعوس ولاصحاري
ون عطاله مع خطوطن مستجده=الحصى من قو حذفه له شراري
يانديبي عن لزومي لاترده=لايوقف غير عند سعود ثاري
وصل المكتوب من يدك ليده=واعرف انه فاهم وكاتب وقاري
شيخ قومن له مقام وله موده=كاسبن قولة نعم ذيب الغداري
والكرم ورثن لبوه ورث جده=والرجال اهل الكرم فيها نماري
من مهامزتن لها مده وهده=يوم دورات المحازم والسواري
كم عدون من فعايلها تضده=بالرماح وبالسيوف وبالنزاري
من بني رشيد مكسرت الاشده=عزوتن بفعالها زاد افتخاري
والكلام اللي عليه اثبات اعده=مالتفت للي سوالفها هذاري
ولازمي ماكل رجالن يسده=غير رجلن فيه للفزعه مواري
والقصيد يشدني قافه واشده=يم ابن ثاري طرالي كل طاري
ماجنى الا الوضح زينات الاخده=لانظرت إلحيها مثل الشباري
والرقاب طوال جردن مستمده=خرع اذانيها لها ذيولن قصاري
اذكر الله كل ماصاح الموده=تقل صفة عسكرن بأمرٍ جباري
ون مشت مع خايعن يفوح نده=بالخزامى والنفل وقت العصاري
تعجب اللي يعرف الذود ويوده=مادخل في وسطها بايع وشاري
والختام ازكى التحيه والموده=للكريم اللي على الفزعات ضاري