لاني بـراع ابـلٍ ولانـي بشـاوي=عاشق بداوه بس ما عنـدي نيـاق
ما عنـدي الا ذيـب الايـام عـاوي=وبرد الشتا قاسي وانـا بيتـي رواق
ما بيـن متـردد ومـا بيـن نـاوي=واقف على حد الأمل تحـت الآفـاق
اقتـل ملامـح حيرتـي بالرجـاوي=وامنع بصبري دمعة اليـاس تنسـاق
عطشان بـس اقـول للنـاس راوي=كيف الورق يروى على يابس الساق؟
ارقد وأنا بطني من الجـوع خـاوي=واقول في الاشراق تقسيـم الارزاق
واعيش لجلك في الصحاري خـلاوي=مابه شجـر ولا مطـر بـس بـراق
افـز لـه فـزة غريـبٍ هــواوي=واقتل بنورة في الحشا ليل الاعمـاق
با بنت ليلـي طـال مالـي مخـاوي=ووحشة ظلام الليل ما عـاد تنطـاق
وجه الزمن عابس ووجهي سحـاوي=يامن يسلي خاطري بعد مـا ضـاق
ماتت حروفي في اللسـان الشقـاوي=لكن ملامحها زهت وسـط الاحـداق
في شاشة عيونـي تترجـم حكـاوي=يرقص لها دمعٍ مـن العيـن دفـاق
وصار الأمل ما بين هاوي وغـاوي=يقتـل متاهاتـه بعبـرات الاشـواق
ان قلت هاوي والله مانـي بهـاوي=وان قلت غاوي شدني نور الاشراق
خطوة ورى خطوة تجـر الخطـاوي=وكل الأمل بعد التعـب ياتـي عنـاق
والخوف كل الخوف بعـد الشكـاوي=ياتي الصباح وينجلي الليـل بفـراق