ياسلامي عد ما ذعذع هبوب ٍ من مهبه=لشواعير القديمه والشواعير الجديده.
كل مسلم يوم يسجد ما طلب ياغير ربه=وانت يلي ما تصلي قول لي وش مستفيده.

البقاء بك وانت نار الشعر يالصاحب تشبه=مير انا ذيبً كما سرحان ما كلن يصيده
احمد الله واشكره والبحر لاتاقع بغبة=يمكن انه يغرقك وتصير ياشاعر فقيده

كيف بن ٍ من يمين اللي على يمناه صبه=وأنت كيف البن لا تنقصه دامنا نزيده.
أحمد الله واشكره والمعتلى بسمه ننبه=وانت مثل الطير الابرق منحني فوق الجريده.

لوّ بغيت امدحك قالو بعض خلق الله يسبه=لكن النية على حسب العمل واللي تريده
انت شاعر دبلوماسي مار ذب الريع ذبه=حام طيرك فوق راسك مالقى الارياء سديده

كان منت محصل ٍ ما تمتنيه وما تحبه=لا تلخبط بالبيوت اللي يعزن القصيده.
يكفي العارف من الموضوع يابو زيد لبه=لكن اسمع لا تعاند قدمك رجال ٍ عنيده.

انطحن حبّك ماباقي بالرحى ياكود حبه=وانت ودك تنطحن وتكرر الامر وتعيده
يوم تسرق منجل الفلاّح وان شفته تكبه=مادريت انه بعد لقياك في فرصه سعيده

صاحبي مع غفلته شاله مطب ٍ عن مطبه=ونحرف سواقنا مع سيد آخر ماهو سيده.
تدري إن الباب حطو له عن السرقان ضبه=يالسروق اللي تحاول سرقة البنك ورصيده.

يوم قرب وقت الاذان وبعد دق المنبه=وانت تصحى من منامك بعد ماجتك المكيده
الوفاء والصدق يابن الناس من شرط المحبه=وانته اسلم واللقاء المقبل بالايام المديده

موترك غلق وقوده لكن اصفط ثم عبه=لا تحسبنك وحيد القرن وايامك وحيده.
انت عبس ٍ رشيدي منت من سكان جبه=اكرب شداد الاصايل من بقيق اليا عبيده.

تصبح على خير وتشرفنا باللعب معك أخي / مجرد انسان .. .. وصح لسانك ولا هنت جزل من راس ٍ جزل

وسامحنا لا بدا قصور منا والنوم سلطان وتصبحوا على خير



وأنتظر ردك على البيت الاخير