الكلمه اللي بصدري ودي اقولها = مشاعرٍ صادقه محبوسةٍ من زمان
كلمه سجينه بصدري دايرٍ حولها = صابر عليها واخاف تصير زلة لسان
أخاف لامن نثرت الشعر بحقولها = يطغى عليها مع التعبير صدق البيان
مشاعر الروح تفهم عكس مدلولها = ويضيع من ناظم المرجان عقد الجمان
وترخص مثل مارخص بأمواجها لولها = وتصير قصه طويله بين كانت وكان
وتحسب عليه وهاجوسي ماهو حولها = بعض الاوادم يغيّر ياللـه المستعان
لولا القوافي بفكري تسرج خيولها = واقطع ضما الغيض معها من مكان المكان
أسرح بذكرى تعدت ما اختفا زولها = وأقول ياصاحبي هونك عليك الأمان
من واقع الحال حالي جاك مرسولها = استقبله كان في قلبك مكان وحنان
الحاصل أنك كسبت وهاك محصولها = مانيب طالب على صادق شعورك ضمان
المهرة اللي براسي هل مجدولها = اليا ارهمت تسمع براسي صهيل الحصان
ترجمتها والقوافي شالت حمولها = مشاعري قدمت لك خلطة الزعفران
أبا اقصر السالفه وابحث عن حلولها = يمكن بتاخيرها خيره وأنا اصبح معان
بعض السوالف تمل الناس من طولها = من كثر ترديدها في صدقها يستهان