يالعين والله لازم فرق الاخوين =غصبن عليك وفعل ربي مطاعه
اليوم لاونك من الدمع تعطين =جبتي هميل ولا بكثرة نفاعه
وخوي هو ريف الاهل والمساكين =وزبن الضعيف وريف كل الجماعه
هو مزبني عن واحد يطلب الدين =لطام خشم اللي براسه صعاعه
حا اللغب من دونه اللبن والطين =ولفو عليه بخامتن طول باعه
والقلب عيا لايطيع المعزين =وياشين فرقى الاخوعقب اجتماعه
ليته بقى من شان حالي زمانين =ولا علي قصير العمر باعه
وخوي من ترث الحباب القديمين=اللي حفضونا حفظ راعي الوداعه
والله ماعده مضاله نهارين =ستين عامن كنهن ربع ساعه
واليوم انا مثل كسير الجناحين=طيرن نزل بلارض عقب ارتفاعه
يبي يطير ومجمع الريش قسمين=عاب الجناح ومفختن عن وقاعه
ماينجبر لو جاب كل المداوين=دنى الرحيل وصب فرقى وداعه