قبيلة بني رشيد - المحاوره (16) العقاد × المعزب

من مايقول الحق والله يخافه = يبى يولف فيك هرجن ماهو فيك

العقاد

الليله المعنى جزيل بكلافه=قم يالمعزب وحتزم بالمساليك
انا معك شاعر يحب الضيافه=شاعر وعندي شعر والله يخليك

المعزب

حيالله الـي قيـد خليـف قافـه=والاانت شاعر ماجهلنا معانيـك
فالكوكب العبسي نعرفك عرافـه=أقراك فعيوني ولو صحت موحيك

العقاد

بارك بك الله ياعظيم المحافه=شاعر وبلا شعار ماحد بحاديك
نلعب على معنى ونلعب مصافه=والعب يبغى شاعرن مثل ناديك

المعزب

لاصار يالعقـاد عنـدك نصافـه=أعداك وهي أعداك تفرح بطاريك
برق الحيا ينوض بقصى سعافه=لبيك يابـرق المخاييـل لبيـك

العقاد

صدفه صدفتك يالمعزب صدافه=وانا تشرف باللعب معك واعطيك
ون الطرافه نوعها بالطرافه=والشعر معنى وفتل اللعب بيديك

المعزب

مالي على شاعر بدالـك حسافـه=مـادام يالعقـاد هـذي مراميـك
واللي مع الفرجه ماياخـذ لحافـه=برد الشتاء عنه السماء كيف يدفيك

العقاد

مشكور لعبك فيه اناسه وضافه=والي مهو يلعب معك مايشاكيك
دايم نبي معاني الشعر قافه=نسري على كل الديار بمحاريك

المعزب

الصبح مادري وش تقول الصحافه=يالشاعر اللي حاظرك مثل ماضيك
والبكـره اللـي فرقبتهـا نحافـه=أخاف مع فج الخلا تنقطـع فيـك

العقاد

الطايره تمشي و فيها خفافه=من عقب خيال الابل والمطاميك
بس الطريق الزين مافيه لافه=واللي يلف الدرب ياخذله اتريك

المعزب

شاعر ومن بيني وبينك مسافه=لولا جهاز النت وشلون ألاقيك
تحية معزب ومعها أعترافـه=اخر كلامي جعل ربي يعافيـك

العقاد

امحاورتنا انتهت وانت افه=مأحد عليكم يقدر ان حل طاريك
وانا تراني شاعر في كل طافه=العب وشعري فيه ذوق ومباريك