للقدم دربٍ منه ماعرف مخراجه=كل ماهب الهواء من شمالٍ سجّه
حلم مدري علم والا وهم وازعاجه=ماعرف وين اتّجه تايهٍ بالعجّه
منك ياللي بين خده وبين حجاجه=عين حرٍ يذبح الصيد مهما وجّه
ياطبيب القلب ياعلّته وعلاجه=ماتشوف اللي منك حالته مرتجّه
حاجتي لك والله إن مابعدها حاجه=والرسايل ماتصلك الله من الدَّجّه
باب بيتك محكم ومبرمٍ مزلاجه=وأنت تبرمني من بعيد برم الدِّجّه
ان سمعت الهرج لايزعجك هرّاجه=نجّ عمرك من هروج العواذل نجّه
ماعلينا من هروج ألسنٍ منعاجه=مايقارع بالحجج غير راعي حجّه
حبنا سامي عن البهرجه بأبراجه=حبنا ماهو محبّة عَوَج مِعْوَجّه
مع طريقٍ يخزي إبليس في منهاجه=اتفقنا به قبل لاتلجّ اللجّه