الدعوة اللي من سلايل عبس ما عنها صدود=ربع ٍ على طيب السلوم تزورنا ونزورها
بني رشيد اهل الفعول الغرّ من عهد الجدود=تستاهل السبعين نعم غيابها وحضورها
ما يعتقب ليل ونهار وما يهز الغصن نود=سلام يا شقر الحرار اللي هناك وكورها
سلام ياللي ضيفكم يقلط على شطّ القعود=ياهل الكرم والجود في يسر السنين وجورها
ياهل القصور اللي بها كيف ٍ يدار وطيب عود=وياهل دلال ٍ ما تبات ولا تبات نجورها
رجالكم ما له حدود وطيبكم ماله حدود=قبيلة ٍ تاريخها يذكر و يذكر دورها
خويكم يرقى سنود وجاركم يرقى سنود=اجواد و الاجواد دايم ما تضيق صدورها
انتم حزام اللي من الايام مونس له لهود=لا نوّخت به سابقه فوق الصفاه بزورها
وانتم مطانيخ الرجال اللي مواقفكم تكود=وانتم مصابيح الظروف ليا احتكم ديجورها
وانا من عتيبه حماة البل ليا ذلّ الشرود=يوم السباع من الجثث تاكل وتترك سورها
نفخر بطيب فعولنا والعود في عين الحسود=فعل ٍ مثل شمس النهار ليا تجلّى نورها
فعولنا يوم الفتيل يشب من قدح الزنود=نقلط على دهم الجموع بما يفج نحورها
حنا عتيبه في نواصي خيلنا النصر معقود=ليا تنادوا يا النشاما شلفكم و ظهورها
نمشي بنمراً نوّها يمطر وعارضها يقود=نمراً يصيب الضلع هزّه من وحم طابورها
هذي حقايق و الحقايق ما يغيرها جحود=صيّورها تبقى على مرّ الدهر صيّورها
يا عيد سلم لي على ربعك عساهم فالوجود=والله يديم افراحها والله يديم سرورها
بني رشيد اهل الفعول الغرّ من عهد الجدود=تستاهل السبعين نعم غيابها وحضورها